אומגעווענליכע סצענע אין פילאדעלפיע: א מאביליטי סקוטער שלעפט א ריזיגן לייטער אינמיטן טראפיק

א פילאדעלפיע דרייווער האט אפגעכאפט אן אומגעווענליכע סצענע אויף קעמערע: א פערזאן אויף א 'מאביליטי סקוטער' שלעפט א ריזיגן לייטער אינמיטן טראפיק. אינעם ווידעא זעט מען ווי דער סקוטער פארט זיך רואיג אראפ א ברייטע גאס מיט עטליכע לעינס, בשעת ער טראגט דעם לייטער אויף די ברייט, פארבייגייענדיג קראסוואקס, געפארקטע קארס און קעגנקומענדיגע טראפיק. די דרייווערין וואס האט עס אפגעכאפט האט זיך אויסגעדריקט אז זי איז געווען פול מיט "באוואונדערונג" פאר די דרייסטקייט פונעם סקוטער-פארער. דער קליפ האט זיך זינט דאן צושפרייט איבער די אינטערנעט פלאטפארמעס, און פילע קענען פשוט נישט אויפהערן עס צו איבערקוקן.

די רעאקציעס פונעם פובליק זענען געווען צעטיילט. טייל מענטשן האבן עס אנגענומען מיט א שמייכל און זען דערין א קריעטיווע לעזונג וויאזוי זיך אליין אן עצה צו געבן, בעת אנדערע האבן אויסגעדריקט זארג איבער די סכנה פון א לאנגן לייטער וואס שטעקט זיך ארויס אינמיטן א פארנומענע טראפיק, וואס קען בלאקירן לעינס און חלילה פירן צו אן עקסידענט. עטליכע האבן אפילו קריטיקירט פארוואס דער קליפ באקומט בכלל אזויפיל אויפמערקזאמקייט אין א צייט וואס עס קומען פאר אזויפיל מער וויכטיגע און ערנסטע נייעסן איבער דער וועלט.

דערווייל בלייבן נאך איבער אסאך אומפארענטפערטע פראגעס ארום דעם אינצידענט, צווישן אנדערע: ווער איז דער סקוטער-פארער? וואוהין האט ער געטראגן דעם לייטער? און צי איז עס בכלל געווען געהעריג צוגעבינדן און פארזיכערט פאר די רייזע?