דריי יאר זינט די שוידערליכע שמחת תורה אטאקע: ארץ ישראל אפצייכנט דעם טאג מיט צער און אנדענק

פונקטליך 6:29 אינדערפרי, מיט דריי יאר צוריק, האבן כאמאס טעראריסטן דורכגעבראכן דעם עזה גרעניץ צויים און אריינגעשטורעמט אין דרום ארץ ישראל, אנהייבנדיג דעם טראגישסטן און בלוטיגסטן טאג אין די היסטאריע פונעם לאנד. גאנצעטע שטעט און ישובים זענען איבערגעפאלן געווארן, הייזער זענען אונטערגעצינדן געווארן, און פאמיליעס זענען ברוטאל אומגעברענגט געווארן אין זייערע בעטן. די טעראריסטן האבן דורכגעפירט מאסן רציחות, פארכאפונגען און שוידערליכע אכזריות וואס האט אויפגעטרייסלט די גאנצע וועלט.

ארום 1,200 מענטשן זענען אומגעברענגט געווארן און נאך 251 זענען פארכאפט געווארן אלס משכונות אין יענעם ביטערן אינדערפרי, אן אטאקע וואס האט אונטערגעצינדן די שווערע מלחמה אין עזה וואס האלט נאך אלס אן און טוישט דעם געזיכט פונעם ראיאן דריי יאר שפעטער. היינט מיטוואך, האט זיך דאס לאנד אפגעשטעלט נאכאמאל אין די זעלבע מינוט. איבער גאנץ ארץ ישראל איז פארגעקומען א מינוט פון שטילקייט און אנדענק, אנגעהויבן פונעם 'איילון הייוועי' אין תל אביב ביז די חורבות פונעם 'נאווע' פעסטיוואל ארט.

דער היינטיגער יארטאג טראגט א באזונדערע געוויכט, וויבאלד דאס איז דער ערשטער יארטאג זינט אלע פארבליבענע לעבעדיגע און אומגעקומענע משכונות זענען ענדליך צוריקגעקערט געווארן. דאס האט געשלאסן איין קאפיטל פון צער און געעפנט א נייע פאזע פאר די פאמיליעס וואס פרובירן איבערצובויען זייערע לעבנס.

צענדליגע אנדענק צערעמאניעס זענען אפגעראכטן געווארן איבערן לאנד, אריינגערעכנט א מלוכה'שע פארזאמלונג אויפן 'הר הרצל' געפירט דורכן פרעמיער מיניסטער בנימין נתניהו. אין זיין רעדע האט נתניהו געשוואוירן אז כאמאס וועט קיינמאל מער נישט געוועלטיגן אין עזה, און אז מען וועט ווייטער נאכיאגן יעדן איינעם וואס איז געווען פאראנטווארטליך פאר די אטאקעס.

די יארטאג אפצייכענונג קומט בלויז עטליכע וואכן בעפאר די נאציאנאלע וואלן, וואו די אקטאבער 7 אטאקעס ווערט ערווארטעט צו זיין א הויפט טעמע פאר די וויילער. איבער גאנץ ארץ ישראל איז דער מעסידזש ביי יעדע צערעמאניע געווען קלאר און פעסט: די קרבנות פון יענעם אינדערפרי, און די שרעק וואס זיי זענען דורכגעגאנגען, וועלן קיינמאל נישט פארגעסן ווערן.