נייע טעכנאלאגיע: א קאמפאני רעיזט 1.3 מיליאן דאלאר פאר קלוגע ברילן וואס טוישן 'שטילע רייד' צו טעקסט

די "סאבוואקאל קאמפאני" (Subvocal Company), געגרינדעט דורך ארוש יאדאוו און ארנאוו קומאר, האט געמאלדן אז זיי האבן אויפגעטריבן 1.3 מיליאן דאלאר אין א 'פרי-סיד' פאנדינג רונדע פון 'וויי קאמבינעיטאר' און 'עפאר קעפיטאל', צו בויען ספעציעלע ברילן וואס קענען פארוואנדלען שטילע רייד אין טעקסט.

די קאמפאני זאגט אז זייער פראטאטיפ ארבעט דורך נאכפאלגן די אינערליכע מוסקלען פון מויל מיט סענסארס וואס דארפן אפילו נישט אנרירן דעם מענטש. עס כאפט אויף די שטילע, כמעט אומזעבארע באוועגונגען פון מויל און טוישט עס צו טעקסט מיט א שנעלקייט פון מער ווי 200 ווערטער א מינוט - בערך די זעלבע ספיד ווי א נארמאלע שמועס.

דער געדאנק אונטער דעם איז פשוט: טייפן אויף א קיבאורד נעמט לאנג, און רעדן צום קאמפיוטער אין פאבליק איז אומבאקוועם. לויט די קאמפאני, ארבעטן די ברילן אן קיין שום מייקראפאן אדער קעמערע, אזוי אז דער וואס טראגט עס קען אריינלייגן טעקסט שטילערהייט און באהאלטן, אין סיי וועלכע פלאץ אדער אומשטאנד.

אין א 77-סעקונדע דעמא ווידעא וואס זיי האבן ארויסגעשטעלט, זעט מען וויאזוי די טעכנאלאגיע ווערט באנוצט אין אן אפיס, מיט א לייוו סיגנאל וואס ווייזט זיך נעבן דעם טעקסט וואס עס פראדוצירט. די מעלדונג איבער די נייע פראדוקט האט שוין אריבערגעשטיגן 11 מיליאן וויואס, און מ'קען עס שוין יעצט פרי-ארדערן.

דאך דארף מען געדענקען אז די קלעימס איבער די שנעלקייט קומט פון די קאמפאני אליינס, און קיין שום אומאפהענגיגע טעסטס זענען נאכנישט געוויזן געווארן אין פאבליק, ממילא איז נאך אן אפענע פראגע ווי פונקטליך עס וועט ארבעטן אין די רעאלע וועלט אינדרויסן פון א דעמא.

דער געדאנק פון 'שטילע רייד' טעכנאלאגיע איז נישט קיין נייע זאך, און גרעסערע קאמפאניס יאגן זיך אויך נאך דעם, אזוי אז 'סאבוואקאל' האט א שטארקע קאמפעטישן. די פראגעס וואס מענטשן וועלן יעצט פרעגן איז ווי גוט עס ארבעט פאר פארשידענע קולות און אקצענטן, ווי באקוועם די ברילן זענען צו טראגן, און וואס דער ענדגילטיגער פרייז וועט זיין.