אן אומגעריכטע בונד? סענדערס זאגט אז טראמפ וועט מעגליך שטיצן א העכערונג אין מינימום וועידזש און אוניווערסאלע העלט קעיר

סענאטאר בערני סענדערס, א לאנגיעריגע קריטיקירער פון דאנאלד טראמפ, האט געצויגן אויפמערקזאמקייט ווען ער האט אנגעדייט אז דער פרעזידענט וועט מעגליך זיין אפן צו אן אפמאך איבער העכערע געהאלט און העלט קעיר.

לויט זיינע ווערטער, ווען טראמפ זעט ווי מיליאנען אמעריקאנער ארבעטן פאר וואס סענדערס רופט "הונגער געהאלט", וועט ער מעגליך האבן סימפאטיע און שטיצן א העכערונג אינעם מינימום וועידזש צו א נארמאלע לעבנס-געהאלט. סענדערס האט אויך געזאגט אז טראמפ וואלט ווארשיינליך זייער געוואלט נעמען קרעדיט פארן צושטעלן העלט קעיר פאר יעדן איינעם, עפעס וואס יעדע אנדערע גרויסע לאנד טוט שוין. סענדערס שטופט שוין לאנג פאר א פעדעראלע מינימום וועידזש פון 17 דאלאר א שעה, א דראסטישע שפרונג פונעם 7.25 דאלאר וואס איז שוין לאנג די נאציאנאלע סטאנדארט.

סענדערס האט אבער נישט געמאכט קיין צו גרויסע הבטחות. אויף די פראגע צי ער גלייבט אז די צוויי זייטן קענען ארבעטן אינאיינעם, האט ער געענטפערט "מעגליך", צולייגנדיג אז ער קען גארנישט גאראנטירן, אבער עס איז ווערט די אנשטרענגונג.

די קאמענטארן שטימען מיט זיין פריערדיגע שטעלונג, וויבאלד סענדערס האט שוין בעפאר געזאגט אז ער איז גרייט צו ארבעטן מיט טראמפ אויף אישוס וואס העלפן ארויס ארבעטנדע פאמיליעס, בעת ער וועט אים ווייטער קעגנשטעלן אויף אנדערע פאליסיס. ענדע 2024 האט ער געזאגט פאר די 'ען-בי-סי' נייעס אגענטור אז ער וויל פאראויסרוקן א 'בייפארטיזען' העכערונג אינעם מינימום וועידזש, נאכדעם וואס טראמפ האט געזאגט אז ער איז אפן צו דעם געדאנק.

צי טראמפ וועט טאקע שטיצן א העכערע געהאלט אדער אוניווערסאלע העלט קעיר בלייבט דערווייל אן אומפארענטפערטע פראגע, און עס בלייבט איבער צו זען וויאזוי אזא אפמאך וואלט אויסגעזען און צי די רעפובליקאנער אין קאנגרעס וואלטן מיטגעשפילט דערמיט.