א אומבאשרייבלעכער ווייטאג און אבלות איז באפאלן די וועלט פון תורה און חסידות מיט די ביטערע נייעס איבער די הסתלקות פון כ"ק אדמו"ר מבית שמואל צבי ספינקא זצוק"ל, הגאון הצדיק רבי יוסף מאיר הורוויץ זצוק"ל, וועלכער האט פארלאזט די וועלט נעכטן נאכט און עולה געווען לגנזי מרומים אין דעם יונגן עלטער פון אכט און פופציג יאר.

"שמש בא בצהרים" איז דער פאסיגסטער אויסדרוק פאר דעם שווערן פארלוסט, ווען מיר באוויינען דעם פריצייטיגן הסתלקות פונעם ספינקא רבי'ן זצוק"ל, וועלכער האט געהאט א טיפע השפעה פון תורה און חסידות אויף כלל ישראל.

ער איז געווען א געהויבענע מענטש וואס האט אנגעווארמט די הערצער פון אידן צו זייער טאטע אין הימל, פארזעצנדיג די הייליגע קייט פון זיין טאטע און זיינע זיידעס פונעם ספינקא גזע.

דער רבי איז געווען דער עלטסטער זון פון כ"ק אדמו"ר רבי ישכר דוב בעריש מספינקא זצ"ל, בעל 'דובר מישרים', און דער באליבטער אייניקל פונעם ספינקא רבי'ן הרה"ק רבי הערשעלע זצוק"ל, וועלכער האט געהאט צו עם אן אויסערגעוויינטלעכער ליבשאפט.

ער איז אויפגעוואקסן אין זיינע יונגע יארן אויפן שויס פון זיין גרויסן זיידן, לערנענדיג פון אים תורה און חסידות און זיך געווארמט לאורו הגדול.

אום שבעה עשר בתמוז תשכ"ח איז דער רבי געבוירן געווארן אין וויליאמסבורג צו זיין טאטע כ''ק  רבי בעריש זצ"ל און זיין מאמע הרבנית מרת בלומא שרה ע"ה, וועלכע איז ליידער אומגעקומען אין א שרעקלעכע טראגעדיע, רחמנא ליצלן, מיט צוואנציג יאר צוריק.

זי איז געווען די טאכטער פון הגאון הצדיק רבי אלעזר מייזליש זצוק"ל אב"ד אוהעל.

מיט א שיינע יחוס ביז צו די צדיקים און קדושים פון די פריערדיגע דורות, תלמידי הבעל שם טוב הקדוש, איז ער געווען א שטאלצער בנן של קדושים.

אלס אייניקל פונעם ספינקא רבי'ן זצוק"ל איז ער אויפגעוואקסן אין א געהויבענער אטמאספערע, שטרעבנדיג צו שטייגן אין תורה און יראת שמים מיט אומגעווענטלעכע התמדה און איידעלע מידות אייגנשאפטן מיט וואס דער רבי זצ"ל האט זיך אויסגעצייכנט זיין גאנץ לעבן.

ער איז געווען בארימט מיט זיין איידעלקייט און עניות אין יעדן הינזיכט.

אלס קינד האט דער רבי זצ''ל געלערנט אין דעם ספינקא תלמוד תורה אין וויליאמסבורג און איז געווען איבערגעגעבן און באליבט ביי זיין זיידן הרה"ק רבי הערשעלע זצוק"ל.

אלס חתן איז ער אויסגעוועלט געווארן אלס איידעם ביי יבלחט"א כ"ק אדמו"ר מקרעטשניף שליט"א פון רחובות.

צוזאמען מיט זיין חשובע הרבנית תליט"א האט דער רבי אנגעהויבן בויען זיין הויז געבענטשט מיט קינדער און אייניקלעך.

שוין אלס יונגערמאן האט דער רבי אנגעהויבן זיין רייכע עבודה פון הרבצת התורה.

ער האט געדינט אלס ראש כולל ספינקא וואו ער איז געווען א גרויסער מרביץ תורה.

דורך זיין אומגעוויינטלעכע מסירות נפש פאר יעדן יחיד און זיין זעלטענע ווארעמקייט צו יעדן איד, האט ער באוויזן צו הייבן פילע אידן צו אביהם שבשמים, זיי מקרב זייענדיג טריט ביי טריט.

מיט די הסתלקות פון זיין גרויסן פאטער, דער ספינקא רבי רבי בעריש זצ"ל אום חול המועד סוכות תשס"ח, איז דער רבי זצ"ל אלס עלטסטער זון געשטעלט געווארן איבערצונעמען די מנהיגות און ממלא מקום זיין זיין פאטער בראשות די חסידות.

דער רבי האט אנגענומען די עול ההנהגה מיט גרויס איבערגעגעבנקייט, משפיע געווען אויף זיינע חסידים און מעריצים מיט זיין גאנצער כוח, און געברענגט תורה און חסידות אין א ברייטן און מעכטיגן פארמאט.

ליידער איז דער רבי זצ"ל אוועקגעריסן געווארן אין די בעסטע יארן.

מער ווי א יאר צוריק איז די מחלה נוראה ר"ל אנטדעקט געווארן ביים רבי'ן.

אנטקעגן די האפענונגען פאר א רפואה שלמה, האט זיך זיין מצב לעצטנס זייער פארערגערט, רחמנא ליצלן.

נעכטן נאכט האט דער רבי ציריקגעקערט זיין ריינע נשמה צום יוצר כל אין מאונט סיני שפיטאל אין מאנהעטן, ארומגענומען מיט זיינע קינדער און בני המשפחה.

דער רבי לאזט איבער א משפחה וואס גייט ממשיך זיין זיין וועג, פון איינפלאנצן תורה, חסידות און יראת שמים אין די הערצער פון צאללאזע אידן.

די לויה וועט פארקומען היינט אום 12:00 אזייגער נאכמיטאג ביים בית המדרש ספינקא אין וויליאמסבורג, און די קבורה וועט פארקומען אויפ'ן ספינקא בית החיים אין ניו דזשערסי. יהי זכרו ברוך.