דאנערשטאג, נאוועמבער 12, 2026, האט א דזשורי אין די 'וואלוויטש קראון קאורט' אין לאנדאן געפונען שולדיג צוויי מענער, דער 41 יעריגער מאסטאפא סעפאהוואנד און דער 46 יעריגער פארהאד דזשאוואדי מאנעש, פארן ארויסהעלפן אן אויסלענדישע שפיאנאזש אגענטור אונטער די 'נעשאנאל סעקיוריטי עקט'. די אורטייל קומט נאך א זעקס-וואכעדיגע טרייעל איבער זייערע שפיאנאזש אקטיוויטעטן.

די צוויי זענען אנגעקלאגט געווארן פארן נאכגיין און האלטן אן אויג אויף צוויי זשורנאליסטן פון 'איראן אינטערנעשענאל', קאמביז כאסעיני און מאדזשטאבא פאורמאכסען, ווי אויך אויף דזשאנאטאן טורנער, א גרינדער פון די 'יו-קעי לויערס פאר איזריעל' גרופע. לויט די קאונטער-טעראריזם פאליציי, זענען די שפיאנען דירעקטירט געווארן דורך די איראנער רעוואלוציאנערע גווארדיע (IRGC) אדער דורך פארמיטלער פאר די איראנער שפיאנאזש.

סעפאהוואנד איז אויך געפונען געווארן שולדיג אויף א צווייטע קלאגע פון דורכפירן סורוועילענס מיט די ציל צו דורכפירן ערנסטע געוואלדטאטן קעגן א פערזאן אין ענגלאנד. זיין קאמפאניאן מאנעש איז ריינגעוואשן געווארן פון די צווייטע טשארדזש. א דריטער אנגעקלאגטער אין די קעיס איז אינגאנצן פרייגעשריבן געווארן פון אלע קלאגעס.

פראסעקיוטערס האבן ארויסגעברענגט אין געריכט וויאזוי די מענער האבן באזוכט אדרעסן וואס זענען פארבינדן צו זייערע צילן, געכאפט בילדער און ווידעאס, און אפילו גענוצט טעכנאלאגיע ווי 'טשעט-דזשי-פי-טי' (ChatGPT) צו זוכן אינפארמאציע אויף זיי אנליין. זיי האבן אויך באקומען בילדער, אדרעסן און אנדערע פריוואטע דעטאלן פון קאנטאקטן פארבינדן צו די IRGC.

פאר זיין ארבעט איז סעפאהוואנד צוגעזאגט געווארן צענדליגע טויזנטער פונט, און אין איין מעסעדזש האט ער געבעטן ארום 197,000 דאלאר כדי צו "פינישן דעם ציל".

בעת'ן טרייעל האט סעפאהוואנד מודה געווען אז ער האט דורכגעפירט די סורוועילענס, אבער ער האט זיך פארענטפערט אז ער האט עס געטאן מורא האבנדיג פון די קאנסעקווענצן אויב ער זאגט אפ די איראנער. מאנעש, פון זיין זייט, האט געלייקנט אז ער האט בכלל געוואוסט אז זיינע אקטיוויטעטן העלפן ארויס די איראנער שפיאנאזש. איראן אליינס האט שוין עטליכע מאל געלייקנט סיי וועלכע פארבינדונג צו די אקטיוויטעטן.

די פאליציי האט אינאיינעם מיט די אורטייל ארויסגעגעבן ווידעא פוטעדזש פון זייער ארעסט וואס איז פארגעקומען דעם 3'טן מאי, 2025.

ביידע מענער ערווארטן צו הערן זייער אורטייל (סענטענסינג) דעם קומענדיגן 17'טן דעצעמבער אין די 'אלד בעילי' געריכט הויז. די פאליציי זאגט אז די קעיס שפיגלט אפ די כסדר'דיגע און וואקסנדע טעראר סטראשע וואס ענגלאנד פראבירט צו באקעמפן מצד איראן.