מאראקא פלאנירט מעגליך צו קויפן איזראעלישע לאנג-שטרעקיגע 'לארא' מיסילס פאר אמעריקאנער 'היימארס' סיסטעמען

מאראקא גרייט זיך מעגליך צו מאכן א ריזיגע שפרונג אין איר מיליטערישע קראפט. לויט דיפענס באריכטן, באטראכט דאס לאנד צו אינטעגרירן די איזראעלישע IAI 'לארא' (LORA) באליסטישע מיסיל סיסטעם אין די אמעריקאנער-געמאכטע 'היימארס' (HIMARS) לאנטשערס וואס זיי דארפן באקומען אין די נאנטע צוקונפט.

די 'לארא' מיסילס זענען געבויט צו טרעפן צילן צווישן 400 און 500 קילאמעטער ווייט, מיט א פונקטליכקייט פון אונטער 10 מעטער. דאס איז א שטארקע העכערונג פון די געווענליכע 300 קילאמעטער רעינדזש וואס די היימארס סיסטעמען אפפערן. די סיסטעם ווערט געפירט דורך GPS און איז געבויט צו אטאקירן צילן ווי לופט באזעס און קאמאנד צענטערן אין בלויז עטליכע מינוט פונעם באשלוס צו שיסן.

די איזראעלישע פירמע IAI פארקויפט עס אלס א סיסטעם וואס איז שוין אויסגעפרובירט געווארן אין קאמף, נאכדעם וואס אזערביידזשאן האט עס ברייט באנוצט קעגן ארמעניע אין די 2020 מלחמה.

עס ווערט ערווארטעט אז IAI וועט ארויסשטעלן די 'לארא' סיסטעם ביים קומענדיגן 'מאַראַקעש עיר שאו' קומענדיגן חודש, צוזאמען מיט אנדערע וואפן סיסטעמען. באריכטן געבן אן אז דאס קען עפענען די טיר פאר אן אפיציעלע קאנטראקט, כאטש דערווייל איז נאכנישט דא קיין באשטעטיגטע אפמאך. IAI האט דערווייל נישט ארויסגעגעבן קיין פרייז אדער א דעליווערי דאטום, און זאגט נאר אז זייער אנוועזנהייט אין מאראקעש איז געצילט צו שטיצן טעכנאלאגישע קאאפעראציע מיט מאראקא און דעם גאנצן ראיאן.

די אינטערעסע פון מאראקא קומט אין א צייט וואס דאס לאנד פארשטארקט אירע זיכערהייט פארבינדונגען מיט מדינת ישראל זינט די 'אברהם אפמאכן'. מאראקא האט שוין איינגעקויפט איזראעלישע 'ברק MX' עיר דיפענס סיסטעמען און PULS ראקעטן.

אין די זעלבע צייט גרייט זיך מאראקא צו ווערן דאס ערשטע צפון-אפריקאנער לאנד צו באקומען די אמעריקאנער היימארס סיסטעמען. לויט אמעריקאנער דאקומענטן, זענען 10 פון די 18 באשטעטיגטע לאנטשערס שוין אונטער קאנטראקט פאר'ן יאר 2027, און די איבריגע וועלן נאכפאלגן שפעטער. אויב דער דיעל גייט למעשה דורך, וועט די צוזאמשטעל פון די לאנג-שטרעקיגע 'לארא' מיסילס מיט די מאביליטעט פון די היימארס סיסטעמען באדייטן א מעכטיגע שפרונג אין מאראקא'ס מיליטערישע מעגליכקייטן.