אומזעבארע טעכנאלאגיע: אינזשענירן ערפינדן א נייע דראון וואס דרייט זיך אזוי שנעל אז מען קען עס כמעט נישט באמערקן

אינזשענירן פון די 'נארטוועסטערן אוניווערסיטעט' האבן אהערגעשטעלט א וואונדערליכע נייע דראון, וואס וועגט קוים 30 גראם און ווערט אנגערופן "פענטאם טוויסט" (Phantom Twist). די חדוש פון די דראון איז, אז איר גאנצע קערפער דרייט זיך ארום ביז 25 מאל אין איין סעקונדע, וואס מאכט איר ארום צען מאל שווערער צו באמערקן ווי א געווענליכע דראון.

די דראון ארבעט מיט בלויז איין מאטאר, און די באטעריעס און סירקוט-באורדס זענען צעשפרייט איבער די גאנצע מאשין אויף א ספעציעלן אופן. א פראפעלער האלט די דראון סטאביל אין די לופטן, בשעת די קערפער אליינס דרייט זיך אזוי שנעל אז עס ווערט פשוט א בלור (blur) פארן מענטשליכן אויג, און מען קען עס קוים אויפכאפן. אין ווידעאוס וואס זענען שוין ארויסגעשטעלט געווארן, קען מען זען ווי די קליינע מאשינקע זעט אויס ווי עס ווערט פשוט נעלם ווען עס פליט נעבן ווענט אדער ביימער, וואס באווייזט אז די טעכנאלאגיע ארבעט טאקע אין די רעאליטעט.

אנדערש ווי טראדיציאנאלע קאמאפלאזש וואס פרובירט זיך צוצופאסן צום ארום מיט קאלירן אדער דורכזיכטיגע מאטעריאלן, טוט די דראון פשוט זיך דרייען אזוי פלינק אז עס גיט נישט קיין שאנס פאר קיינעם עס נאכצופאלגן מיט די אויגן. די איינציגסטע זאך וואס געט עס דערווייל ארויס איז די הויכע גערודער וואס די פראפעלער מאכט, וואס הערט זיך ווי א הויכע פייף.

די אינזשענירן זעען אבער א גרויסע פאטענציאל פאר די צוקונפט. זיי האפן צו טרעפן א וועג צו מאכן די דראון שטילער און עקספערימענטירן מיט דורכזיכטיגע מאטעריאלן, וואס וועט ערמעגליכן עס צו נוצן פאר שפיאנאזש, נאכצוקוקן חיות אין די וואלד אן זיי איבערשרעקן, אדער אנצוקומען צו שווערע פלעצער פאר אינספעקציעס. די נייע מהלך פון א מאשין וואס דרייט זיך ביז עס ווערט כמעט אומזעבאר, עפנט א נייע קאפיטל אין די וועלט פון טעכנאלאגיע און ברענגט ארויף פרישע פראגעס ווי ווייט מען קען נאך אנקומען מיט אזעלכע טריקס און פאר וועלכע אנדערע צוועקן מען וועט עס קענען נוצן.