Loading

אייראפע איז אין געפאר: נתניהו ווארנט ביי א הויכראנגיגע זיצונג מיטן טשעכישן פרעמיער מיניסטער אז אייראפע איז א ציל פאר איראנ'ס ראקעטן

ו כסלו תשפ"ז

0 25
Main image for אייראפע איז אין געפאר: נתניהו ווארנט ביי א הויכראנגיגע זיצונג מיטן טשעכישן פרעמיער מיניסטער אז אייראפע איז א ציל פאר איראנ'ס ראקעטן

ווידעאס


נתניהו מיט א שארפע ווארענונג צו אייראפע: "איראן'ס טעראר און מיסילס זענען א דירעקטע געפאר פאר אייך"

דער מדינת ישראל פרעמיער מיניסטער בנימין נתניהו האט ארויסגעגעבן א שארפע ווארענונג צו די לענדער אין אייראפע, דערקלערנדיג אז איראן'ס מיסיל מעגליכקייטן, טעראריזם און נוקלעארע אמביציעס גייען פיל ווייטער ווי די גרעניצן פון מדינת ישראל.


רעדנדיג ביי א הויכראנגיקע מיטינג אין ירושלים דעם מאנטאג, נאוועמבער 16, אינאיינעם מיטן טשעכישן פרעמיער מיניסטער אנדרעי באביש, האט נתניהו געזאגט: "איראן'ס מיסילס, איר טעראריזם און אירע נוקלעארע אמביציעס שטעלן זיך נישט אפ ביי די גרעניצן פון מדינת ישראל. אייראפע איז נישט קיין ארומזיצער - אייראפע איז א ציל."


די באגעגעניש האט צוזאמגעברענגט הויכע מיניסטארן און זיכערהייט באאמטע פון ביידע לענדער צו דורכרעדן פארטיידיגונג קאאפעראציע, ראיאנישע זיכערהייט, העלט קעיר, און אנדערע געמיינזאמע פריאריטעטן.


נתניהו האט ארגומענטירט אז די קאנפראנטאציע קעגן איראן און אירע ראיאנישע אליאירטע איז א טייל פון א פיל ברייטערע קאמף וואס עפעקטירט די מערב וועלט לענדער, ווארענענדיג אז טייל אייראפעאישע רעגירונגען כאפן נישט דעם וואקסנדן געפאר. ער האט דערמאנט דעם באקאנטן אויסדרוק פון ווינסטאן טשערטשיל איבער די "שלאף פון דעמאקראטיעס", צו בעטן די אייראפעאישע פירער זיך אויפצווועקן און אנערקענען די נייע זיכערהייט געפארן בעפאר עס ווערט ערגער.


ער האט ארויסגעברענגט די יעצטיגע מיליטערישע אפעראציעס קעגן כאמאס, חיזבאללא, די חותים, איראנער-געשטיצטע מיליציעס, און איראן'ס נוקלעארע און באליסטישע מיסיל פראגראמען, זאגנדיג אז דאס איז א טייל פון א ברייטערע אקציע אפצושוואכן די טעראר נעצווערק וואס סטראשעט דעם ראיאן.


דער פרעמיער מיניסטער האט אויסגעלויבט די לאנגיעריגע פריינטשאפט צווישן מדינת ישראל און די טשעכישע רעפובליק, דערמאנענדיג וויאזוי טשעכישע וואפן און פליגערס האבן געהאלפן פארטיידיגן מדינת ישראל ביי איר גרינדונג אין יאר 1948. "היינט העלפט מדינת ישראל טעכנאלאגיע פארטיידיגן אייער לאנד," האט נתניהו געזאגט, אונטערשטרייכנדיג די וויכטיגקייט פון שטיין אינאיינעם קעגן געמיינזאמע זיכערהייט סטראשונגען.


פארטיידיגונג קאאפעראציע איז געווען א הויפט טעמע ביי די געשפרעכן, וואו נתניהו האט אנגעוויזן אז מדינת ישראל עיר-דיפענס סיסטעמען העלפן שוין יעצט באשיצן טשעכישע טעריטאריע, און אז ביידע לענדער ארבעטן אינאיינעם צו אנטוויקלען די קומענדיגע דור פון פארטיידיגונג טעכנאלאגיעס.


ער האט געלויבט דעם טשעכישן פרעמיער מיניסטער באביש פארן אנהאלטן נאענטע באציאונגען מיט מדינת ישראל טראץ קריטיק פון אנדערע אייראפעאישע רעגירונגען, באצייכענענדיג די טשעכישע פאזיציע אלס א ביישפיל פון מאראלישע קלארקייט און פאליטישע קוראזש. דער באזוך פונעם טשעכישן פרעמיער מיניסטער, וועלכער איז געקומען באגלייט מיט עטליכע רעגירונג מיניסטארן און הויכע מיליטערישע פארשטייער, צייגט ארויס די וואקסנדע וויכטיגקייט פון די זיכערהייט קאאפעראציע צווישן די צוויי לענדער.


נתניהו'ס הויפט מעסעדזש איז געווען אז מדינת ישראל און אייראפע שטייען אויס די זעלבע זיכערהייט טשאלענדזשעס און מוזן פארשטארקן זייער קאאפעראציע צו באשיצן זייערע בירגער און דעמאקראטישע געזעלשאפטן.