בס"ד

שוידערליך: א מאן איז טראגיש אומגעקומען נאכן אריינשפרינגען אין א טיגער שטייג אין אן ענגלישע וויילדלייף פארק

א זוניגע שבת נאכמיטאג אינעם 'יארקשיר וויילדלייף פארק' נעבן דאנקאסטער, ענגלאנד, האט זיך פארוואנדלט אין א שרעקליכע קאשמאר ארום 1:30 נאכמיטאג דעם 10'טן אקטאבער, ווען א מאן האט איבערגעשפרינגען די הויכע צוימען אריין צו די טיגער אפטיילונג און איז טויטליך אטאקירט געווארן דורך 'אלטיי', דער פארק'ס סיבירער טיגער.

לויט ווי אויגנזעענער דערציילן, האט מען געזען דעם מאן זיך דרייען אינעם פארק מיט העדפאונס, טאנצנדיג צו זיך אליינס. ער האט אפילו געבעטן אן אנדערן באזוכער אים צו כאפן א בילד ווי דער טיגער ליגט אין די בעקגראונד - א קליפ וואס איז שוין געזען געווארן איבער 11 מיליאן מאל אויף די 'עקס' (טוויטער) פלאטפארמע. עטליכע מינוט שפעטער האט ער אנגעהויבן קריכן אויף די 15-פוס הויכע צוים. איין עדות זאגט אז א פרוי וואס איז געשטאנען דערנעבן האט אים פרובירט צוריקצוהאלטן, אבער זי איז נישט געווען גענוג שטארק אים אפצושטעלן.

די באריכטן פון די אויגנזעענער וואס האבן מיטגעהאלטן וואס עס האט זיך ווייטער אפגעשפילט זענען גאר שוידערליך. אן עדות, ענטאני האנט, האט דערציילט פאר די לאקאלע מידיא אז דער מאן האט זיך אראפגעקניט אויף די ערד מיט אויסגעשפרייטע הענט, און זיך געבוקט צום חיה ווי כאילו ער רופט אים צו זיך. דער טיגער האט אים דאן אטאקירט און מען האט געהערט זיינע שרעקליכע קולות.

גלייך נאכן אינצידענט זענען די פארק סטעף אריינגעלאפן און געשאסן צוויי ווארענונג-שאסן אין דער ערד צו דערשרעקן און פארטרייבן די גרויסע חיה. די פארק פירערשאפט האט איבערגעגעבן אז דער טיגער 'אלטיי' איז אומגעשעדיגט און וועט נישט ווערן איינגעשלאפן. אנדערע עדות האבן אנגעוויזן אז דער מאן האט אויסגעזען צעמישט און האט מעגליך נישט ערווארטעט אז דער טיגער וועט אים טאקע אטאקירן.

די 'סאוט יארקשיר פאליציי' זאגט אז דער מאן איז דערקלערט געווארן טויט אויפן ארט. זיין פאמיליע איז שוין אינפארמירט געווארן און ווערט באגלייט דורך ספעציעלע פאליציי אפיצירן. אויף די פארלאנג פון די פאמיליע האט די פאליציי נישט ארויסגעגעבן זיין נאמען, און זיי ווארענען אז סיי וועלכע נעמען וואס צירקולירן אויפן אינטערנעט זענען נישט באשטעטיגט.

דער פארק האט ארויפגעצויגן א שווארצע פארהאנג ארום די טיגער אפטיילונג און זיך פארמאכט פאר די איבעריגע טייל פונעם וויקענד. דערווייל פירט די פאליציי אן אויספארשונג, און עס בלייבן אסאך פראגעס ווי אזוי א באזוכער האט באוויזן אריבערצוקריכן די הויכע צוים אזוי שנעל און וואס עס האט אים געטריבן דאס צו טון.