א נייע ווידעא וואס איז ארויסגעקומען פונעם שטוב פון מרן ראש הישיבה הגאון ר' דוב לאנדא שליט"א האט געצויגן שטארקע אויפמערקזאמקייט, אינמיטן אן אומגעווענליכע קאנפליקט ארום אן ארטיקל וואס איז ארויסגעקומען אין 'יתד נאמן' נאך די דראמאטישע באשלוס צו טוישן די לאנגיעריגע 'דגל התורה' פארשטייער, חברי הכנסת משה גפני און אורי מקלב.

די קאנטראווערסיע האט זיך אנגעהויבן נאכדעם וואס די צייטונג 'יתד נאמן' האט פובליצירט א שארפע ארטיקל איבער די שטורעם ארום די טוישונגען אין די כנסת רעפרעזענטאציע פון דגל התורה. אינעם ארטיקל איז אנגעוויזן געווארן אז די פולע טעקסט איז פארגעלייגט געווארן פאר די גדולי ישראל בעפארן גיין צום דרוק.

אבער די באהויפטונג איז שנעל אפגעפרעגט געווארן דורך די שטוב פון מרן ראש הישיבה הגאון ר' משה הלל הירש שליט"א, וועלכע האבן ארויסגעגעבן א קורצע קלארשטעלונג אז דער ארטיקל וואס איז געדרוקט געווארן אין יתד נאמן איז נישט פארגעלייגט געווארן פארן ראש הישיבה.

דא זענען די אויגן געוואנדן געווארן צו א ווידעא וואס איז פארשפרייט געווארן פונעם שטוב פון הגר"ד לאנדא. אינעם ווידעא קען מען זען ווי ר' טוביה לאנדא, אן אייניקל פונעם ראש הישיבה, גייט איבער דעם דאקומענט מיט זיין זיידן און זאגט אים אז עס איז אויך איבערגעגעבן געווארן פאר הגרמ"ה הירש. דערנאך זעט מען ווי הגר"ד לאנדא גיט זיין הסכמה עס צו פובליצירן, אבער אן דעם וואס זיין נאמען זאל ווערן צוגעלייגט דערצו.

די אריינמישונג פון ר' טוביה לאנדא קומט אין א צייט וואס עס איז דא א ברייטע אינטערעסע איבער די פערזאנען וואס דינען אלס פארמיטלער צווישן די אנטוויקלונגען אין דגל התורה און די גדולי ישראל. לויט באריכטן אין די חרדי'שע גאס, זענען ר' טוביה לאנדא, ר' דבי שפירא און ר' אהרן הירש די דריי הויפט פיגורן וואס ברענגען אריין די אינפארמאציע און מעגליכע נעמען פאר די גדולי התורה, כאטש עס ווערט אונטערגעשטראכן אז די ענדגילטיגע באשלוסן ליגן בלויז ביי די גדולי התורה זעלבסט.

דער יעצטיגער קאנפליקט קומט נאך די מעכטיגע פאליטישע ערדציטערניש וואס איז געמאלדן געווארן אנהייב וואך, ווען הגר"ד לאנדא האט געמאלדן פאר די לאנגיעריגע חברי הכנסת משה גפני און אורי מקלב אז זיי וועלן מער נישט פארזעצן צו דינען אלס דגל התורה פארשטייער אינעם קומענדיגן כנסת, אנגעבנדיג אז עס פעלט זיך אויס אריינצוברענגען פרישע כוחות אין די פארטיי.

באזונדערע באריכטן האבן אויך אנגעוויזן אז ר' טוביה לאנדא איז געווען דירעקט פארמישט אין די געשעענישן ארום דעם טויש, אריינגערעכנט א שמועס צווישן אים און גפני אין דעם אוונט וואס דער באשלוס איז איבערגעגעבן געווארן.

די ניי-פארשפרייטע ווידעא לייגט צו נאך א שיכט צו די דראמאטישע אנטוויקלונגען: עס האנדלט זיך שוין נישט בלויז איבער דעם טויש פון צוויי לאנגיעריגע פאליטיקאנטן, נאר אויך אן עפנטליכע אומקלארקייט איבער וואס פונקטליך עס איז פארגעלייגט געווארן פאר די גדולי ישראל בעפאר דער קריטישער 'יתד נאמן' ארטיקל איז געגאנגען צום דרוק.