טרעטנדיג צו צו די ימי הרחמים והסליחות וועלכע שטייען שוין אט אט ביים שוועל, ווען דאס יאר האלט שוין ביים געענדיגט ווערן, טוט דער באַרימטער זינגער מרדכי קאהן ארויסלייגן א הערליכן נייעם סינגל: "די בעסטע זאך". דער ניגון איז קאמפאזירט געוואָרן דורך דעם טאלאנטירטן מלחין בחסד עליון רבי שלמה נחמיה ראזענבערג.

דאס ליד ברענגט ארויס דעם אינערליכן געפיל פון יעדן אידיש הארץ; מיר ווילן אלע זיין נאנט צום רבונו של עולם, ווייל מיר ווייסן און פילן אז דאס איז די בעסטע זאך אין די וועלט. דאס לעבן באקומט אן אמת'ן טעם און א טיפע משמעות ווען מיר זענען מקושר צום באשעפער. פארקערט, ווען א מענטש פילט זיך דערווייטערט פונעם אייבערשטן, ווערט דאס לעבן ליידיג און טרוקן. אבער טיף אינעווייניג, וויל יעדער איינציגער איד זיין וואויל און לעבן באמת ארומגענומען מיט געטלעכקייט.

יעצט, ווען מ'האלט שוין אזוי נאנט צונעם נייעם יאר, באקומט יעדע אידיש הארץ אן התעוררות זיך צוריקצוקערן, זיך ווידער אנצושליסן אינעם מקור און זוכה זיין צו א גוט געבענטשט יאר. "די בעסטע זאך" קומט אלס די פערפעקטע אידישע תפילה, וואו דער איד שרייט אויס צום טאטן אין הימל: מיר ווילן זיין נאנט צו דיר, אפילו ווען עס איז שווער און פינצטער!