א נייע עפאכע אין דעליוועריס: 'מעטערנעט' שטעלט פאר א פולשטענדיג-אויטאמאטישע 'דראון' סיסטעם

דראון דעליוועריס האלטן שוין אט אט ביים ווערן אינגאנצן זעלבסטשטענדיג. די טעכנאלאגיע קאמפאני 'מעטערנעט' האט אנטפלעקט איר נייע 'M3' דראון סיסטעם, א נעקסט-דזשענערעישאן פראדוקט וואס איז געבויט געווארן צו מאכן דעם גאנצן דעליווערי פראצעס, אנגעהויבן פונעם ארדער ביזן אראפלייגן ביים טיר, כמעט אינגאנצן אויטאמאטיש אן קיין מענטשליכע אריינמישונג.

ווי אזוי ארבעט עס? א קאסטומער פלעיסט אן ארדער דורכן 'M3 פארטאל', און פון דארט נעמט די סיסטעם איבער די קאנטראל. עס ארגאניזירט אויטאמאטיש די שיפמענט, שיקט ארויס א דראון אויפצופיקן די פעקל, פליט עס צום דעסטינאציע, און פירט דערנאך צוריק דעם דראון צו איר סטאנציע זיך צו טשארדזשן און ווארטן אויפ'ן קומענדיגן דזשאב. מען דארף נישט קיין פילאט וואס זאל אכטונג געבן אויפ'ן פליגער, און קיין שום ארבעטער אויף דער ערד דארף נישט מענעדזשן דעם פראצעס; די גאנצע אפעראציע פארט אינגאנצן אויף די אייגענע רעלסן.

די נומערן זענען גאנץ אימפרעסיוו פאר אזא פארגעשריטענע סיסטעם: די M3 קען טראגן א וואג ביז 5 קילאגראם (בערך 11 פונט), אויף א שטרעקע פון ביז 16 קילאמעטער (ארום 10 מייל). אן אינטערעסאנטע מעלה איז אז מען דארף נישט קיין ספעציעלע קאנטעינערס דערפאר; א געווענליכע בעג אדער באקס וואס יעדע רעסטוראנט אדער געשעפט נוצט סייווי, איז גענוג גוט דערפאר.

'מעטערנעט' האט שוין אויסגעקליבן די רעסטוראנט קייט 'דעיבס האט טשיקען' אלס איר ערשטע שותף אין אמעריקע, ווי אויך די קאמפאני 'עפיען' - וואס פירט שוין אן א דראון נעצווערק פאר די ענגלישע העלט קער סיסטעם (NHS) - אלס איר שותף אין ענגלאנד. די קאמפאני פלאנירט צו פראדוצירן די M3 דראונס דא אין די פאראייניגטע שטאטן.

די קאמפאני צילט אנצוהויבן קאמערציאלע סערוויס אין די צווייטע העלפט פון יאר 2027, כאטש זיי דארפן נאך באקומען די נויטיגע סערטיפיקאציעס פונעם 'עף-עי-עי' (FAA) בעפאר די נייע דראונס קענען אפיציעל ארויסגיין אין באנוץ.