אינדאנעזיע געפינט זיך אונטער א שווערע קריזיס, ווען דאס לאנד שטיקט זיך אונטער א דיקע דעקע פון רויך אלס רעזולטאט פון מאסיווע וואלד פייערן, און די צאל מענטשן וואס ליידן פון געזונט קאמפליקאציעס שטייגט מיט אן אומגעהויערע שנעלקייט. לויט די ארטיגע העלט מיניסטעריום, זענען רעקארדירט געווארן 283,270 פעלער פון שווערע אטעם אינפעקציעס צווישן אוגוסט 18 און אקטאבער 13, 2026. די קעיסעס זענען צעשפרייט איבער זיבן פראווינצן און 63 דיסטריקטן און שטעט.

די 'סאוט קאלימאנטאן' ראיאן האט די מערסטע פעלער מיט 74,636, נאכגעפאלגט קורץ דערויף דורך 'סאוט סומאטרא' מיט 74,458 קעיסעס. בלויז אינעם טאג פון אקטאבער 13 זענען צוגעקומען ארום 3,897 נייע פעלער.

בילדער און ווידעאוס פון 'סענטראל קאלימאנטאן' צייגן א שוידערליכע סצענע: די הימלען זענען אראנדזש-ברוין, די טאג-ליכט איז פארטונקלט, און מ'קען קוים זען אויף א קורצע דיסטאנץ, וואס לאקאלע מידיא האט צוגעגליכן צו א סצענע פון א חורבן-וועלט. די מיניסטעריום באריכטעט אז די לופט קוואליטעט איז אין א סכנה'דיגע צושטאנד אין 12 דיסטריקטן איבער סענטראל קאלימאנטאן, סאוט קאלימאנטאן, דזשאמבי, סאוט סומאטרא און ריאו.

באאמטע גיבן איבער אז די שווערע רויך פון די פייערן טראגט מיט זיך פיינע פארטיקעלס, קארבאן מאנאקסייד, נייטראדזשען דייאקסייד און אנדערע גיפטיגע כעמיקאלן. דאס קען פירן צו שווערע הוסטן, קורצן אטעם, א רינעדיגע נאז און האלדז ווייטאג, און קען דראסטיש פארערגערן דעם מצב פאר מענטשן וואס ליידן פון אסטמא און כראנישע לונגען פראבלעמען. קליינע קינדער, טראגעדיגע פרויען, עלטערע מענטשן, און די וואס האבן שוואכע לונגען זענען די מערסטע אויסגעשטעלט צו די סכנה. א שרעקליכע ציפער פון 63,711 פון די רעקארדירטע קעיסעס זענען ביי קינדער אונטער פינף יאר אלט.

די גאווערנמענט האט רעאגירט צום קריזיס דורך אראפשיקן מער ווי 2,000 מעדיצינישע ארבעטער און העלט פראפעסיאנאלן, אויפגעשטעלט 360 רעפעראל שפיטעלער און 87 לאבאראטאריעס צו טעסטן די לופט קוואליטעט, און טיילט אויס מאסקעס און אקסידזשען עקוויפמענט אין די אפעקטירטע געגנטער.

אין די זעלבע צייט גייט אן א מאסיווע אפעראציע צו פארלעשן די פייערן, מיט צענדליגע עראפלאנען וואס זענען אריינגעברענגט געווארן צו העלפן. די פאליציי האט שוין אנגערופן ניין פאלם-אויל קאמפאניס אלס פארדעכטיגטע אין די פייער אויספארשונגען. וויבאלד די סארט פייערן זענען באקאנט צו זיין גאר שווער צו פארלעשן, בלייבט די גרויסע פראגע ווי לאנג די שווערע רויך וועט נאך הענגען איבער די מיליאנען איינוואוינער.