דראמאטישע סצענעס אין מעקסיקא: מיליטער אין א העפטיגע שיסעריי מיט די געפארפולע קארטעל אין כאליסקא

א דראמאטישע ווידעאו וואס איז פארשפרייט געווארן פון כאליסקא, מעקסיקא, צייגט ווי מעקסיקאנער זעלנער שפרינגען ארויס פון זייערע פיקאפ טראקס, זוכן שוץ אונטער געפארקטע קארס, און רוקן זיך פאראויס מיט אנגעגרייטע רייפלס אויף א שטויביגע גאס.

די בילדער זענען רעקארדירט געווארן ביי א פייער אויסטויש וואס איז פארגעקומען דעם 12'טן נאוועמבער אין אקאטלאן, א שטעטל ביים ברעג פון טשאפאלא לעיק. לויט ווי די מיליטער גיט איבער, האבן זיי דארט אפגעשלאגן אן אנגריף פון באוואפנטע באנדע מיטגלידער וואס געהערן צום באקאנטן 'כאליסקא ניו דזשענערעישאן קארטעל' (CJNG).

לאקאלע מעקסיקאנער נייעס קוועלעס באריכטן אז צוויי פון די אטאקירער זענען אומגעקומען, און איינער איז ארעסטירט געווארן. איין זעלנער און א ציווילער בירגער זענען פארוואונדעט געווארן אינעם אינצידענט. די מיליטער האט קאנפיסקירט א 'בארעט' רייפל, גראנאטן, און אן ארמערד קאר. ווי אויך האט זיך א זעלבסט-געמאכטע ארמערד טראק איבערגעדרייט אינמיטן די ווילדע געיעג.

דער אינצידענט דינט אלס א דערמאנונג ווי שטארק באוואפנט און געפארפול די CJNG קארטעל איז נאך אלץ אין כאליסקא, אפילו נאכדעם וואס זייער לאנגיעריגער פירער, באקאנט אלס 'על מענטשא', איז אומגעברענגט געווארן אין א מיליטערישע אפעראציע דעם פארגאנגענעם פעברואר. יענע אפעראציע האט דעמאלטס געפירט צו א כוואליע פון ראוד-בלאקאדעס און געוואלדטאטן איבער עטליכע שטאטן, און די מעקסיקאנער מיליטער פירט נאך אלץ אן א שווערע קאמף קעגן די מעכטיגע קארטעלס.

באאמטע האבן אנגעוויזן אז נאך די יעצטיגע שיסעריי זענען נישט פארגעקומען קיין פרישע בלאקאדעס דורך די קארטעל. ווי ביי רוב אזעלכע פעלער, קומען די באריכטן הויפטזעכטליך פונעם מיליטער און לאקאלע מידיא, וואס לאזט איבער עטליכע פראגע צייכנס איבער ווער פונקטליך די באוואפנטע אטאקירער זענען געווען און ווי אזוי די געיעג האט זיך אנטוויקלט.