איראנער אויסערן מיניסטער מיט אן אפענעם געשטענדעניש: "עס זענען דא צייכנס אז דער נייער העכסטער פירער איז אונטער אמעריקאנער סטראשע, און אנדערע צייכנס אז ער קאנטראלירט אלעס"

דער איראנער אויסערן מיניסטער, אבאס אראגטשי, האט ארויסגעשטעלט א גאר אפענע און זעלטענע געשטענדעניש איבער די אומקלארקייט וואס נעמט ארום דעם נייעם העכסטן פירער פון לאנד, מויזשטעבא כאמענעי. אראגטשי האט געזאגט אז "עס זענען פארהאן אסאך צייכנס אז מויזשטעבא כאמענעי געפינט זיך אונטער א סטראשע פון די אמעריקאנער, און עס זענען דא אנדערע צייכנס אז ער איז אין פולן קאנטראל און אלעס קלאפט."

מויזשטעבא, דער זון פונעם געוועזענעם פירער אלי כאמענעי, האט איבערגענומען די פירערשאפט נאכדעם וואס זיין טאטע איז אומגעקומען אין א געמיינזאמע אמעריקאנער-מדינת ישראל לופט-אטאקע דעם 28'סטן פעברואר 2026. אין יענע אטאקע איז מויזשטעבא אליינס פארוואונדעט געווארן און עטליכע אנדערע פאמיליע מיטגלידער זענען געהרגעט געווארן. זינט ער האט איבערגענומען די מאכט אין מערץ, איז ער נאך נישט געזען געווארן אין פובליק. דאס האט אנגעצינדן חדשים פון שמועות איבער זיין געזונט צושטאנד, אנגעהויבן פון א צובראכענע פוס ביז קלאנגען אז ער געפינט זיך אין א קאמא, בשעת מדינת ישראל באאמטע האבן עטליכע מאל קלארגעמאכט אז ער בלייבט א ציל פאר אן אטענטאט.

טראץ די אפענע אומקלארקייט, האט אראגטשי זיך געהאלטן ביי דעם אז די איראנער פירערשאפט קייט ארבעט ווי געהעריג. "מיר באקומען זיינע קאמענטארן, באפעלן און מיינונגען, און עס איז דא א נאציאנאלע איינשטימיגקייט אויף באשלוסן," האט ער געזאגט.

דורכאויס דעם יאר האט אראגטשי שוין עטליכע מאל פרובירט צו בארואיגן די געמיטער, זאגנדיג פאר רעפארטערס אז כאמענעי איז אין א גוטן געזונט צושטאנד און קאנטראלירט די לאנד'ס אנגעלעגנהייטן, כאטש ער האט צוגעגעבן אז זיכערהייט סיבות האבן באגרעניצט דעם נייעם פירער'ס פובליק אויפטריטן.

די לאנגע אפוועזנהייט האט איבערגעלאזט איראן אין א מאדנע פאזיציע: פון איין זייט פרובירן זיי צו ווייזן סטאביליטעט און א שטארקע פירערשאפט, אבער פון די אנדערע זייט גיט זייער אייגענער הויפט דיפלאמאט צו אז די גרונטליכע פאקטן איבער דעם פירער'ס זיכערהייט און צושטאנד זענען באמת אומקלאר. די דאזיגע קאנטראדיקציע האט נאר נאך מער פארשטארקט די אינטערנאציאנאלע שפעקולאציעס איבער דעם אמת'ן מצב פון די איראנער פירערשאפט, יעצט ווען עס האלט שוין קנאפע זיבן חדשים זינט מויזשטעבא כאמענעי האט איבערגענומען דעם בענקל.