דעם 13'טן נאוועמבער 2026, האט דעפענס סעקרעטערי פיט העגסעט געמאלדן אז ער האט פארארדנט דעם קאמפטראלער פונעם קריגס דעפארטמענט אנצוהייבן אן "ארומנעמיגע טראנספארמאציע" אינעם מיליטערישן פעי-ראל סיסטעם. העגסעט האט מסביר געווען אז ביז יעצט פלעגט דער אלטער סיסטעם צוריקהאלטן דעם געהאלט פון א זעלנער אין פאל פון א קריגעריי אדער אומקלארקייט איבער די פעימענט, ביז די זאך איז געווארן אויסגעקלארט. אונטער זיין נייע פארארדענונג, וועט דער פענטאגאן קודם באצאלן די זעלנער, און ערשט דערנאך אויסגעפינען וואס עס איז געווען די פראבלעם.

ער האט אנגעוויזן אז דער יעצטיגער פראצעדור גייט צוריק צו יאר 2009 און איז אנגעפילט מיט אנגעזאמלטע ארבעט, מאנועלע פראצעדורן, פארשפעטיגטע בענעפיטן און צאלונג גרייזן. ער האט צוזאמגענומען דעם טויש מיט די ווערטער: "פאטריאטן בעפאר פאפיר-ארבעט".

די מעלדונג איז א דירעקטע באפעל אנצוהייבן דעם איבערקערעניש, אבער עס איז דערווייל נישט ארויסגעגעבן געווארן קיין פונקטליכע צייט-פלאן אדער פרייז דערפאר. די 'גאווערנמענט אקאונטעביליטי אפיס' (GAO) גיט איבער אז די מיליטערישע דעפארטמענטס זענען שוין איינגעגאנגען אין דעצעמבער 2025 זיך צו רוקן צו א געמיינזאמע געהאלט-מאדערניזאציע פראיעקט אנגעפירט דורך די 'דעפענס פיינענס ענד אקאונטינג סערוויס', און די דעפארטמענט האט פארלאנגט 216.5 מיליאן דאלאר דערפאר פאר'ן פינאנציעלן יאר 2027. דערווייל איז נאך אומקלאר ווי אזוי די נייע "צאל קודם" רול וועט זיך ספראווען מיט איבער-צאלונגען, וואס די זעלנער וועלן מעגליך דארפן שפעטער צוריקצאלן.

די נייעס קומט אין די זעלבע צייט וואס העגסעט שטייט אויס אן אימפיטשמענט פארזוך, וואס דער רעפובליקאנער קאנגרעסמאן טאמעס מעסי האט אנגעהויבן דעם 9'טן נאוועמבער מיט אכט אימפיטשמענט ארטיקלען, און וואס די דעמאקראטן האבן ברייט געשטיצט. א פראצעדוראלע אפשטימונג האט עס קוים אפגעשטעלט און אפגעלייגט אין א זייט צוליב עטליכע קאנגרעסלייט וואס זענען נישט אנוועזנד געווען, אבער די דעמאקראטן, וועלכע איבערנעמען די מאיאריטעט אין קאנגרעס אין יאנואר, האבן שוין געמאלדן אז זיי וועלן ווייטער אנגיין מיט אויספארשונגען קעגן העגסעט. פון זיין זייט האט העגסעט אראפגעריסן די אימפיטשמענט באמיאונגען, אנרופנדיג עס א "פאליטישע ספעקטאקל".