מיט שווערע געמיטער איז געווארן אויפגענומען די ביטערע בשורה, איבער די פטירה פון הגאון הצדיק רבי יהושע צבי יונגרייז זצ"ל אבד"ק טאלטשאווא, וועלכער איז היינט פארטאגס נפטר געווארן אין עלטער פון 75 יאר, נאכן זיך מוטשענען מיט א שווערע קראנקהייט רח"ל די לעצטע תקופה.

דער רב זצ"ל איז געווען א זון פון הגאון הצדיק רבי אלעזר ארי' יונגרייז זצ"ל אבד"ק טשענגער, און א איידעם ביי הגה"צ רבי יואל היימליך זצ"ל אבד"ק וועגשייד. בן אחר בן האט ער געצויגן זיין שיינעם יחוס ביז הגה"ק בעל מנוחת אשר מטשענגער זי"ע, און אזוי אויך צו נאך גדולי הרבנים פון די פריערדיגע דורות.

דער רב זצ"ל האט מייסד געווען און אנגעפירט זיין שיינעם בית המדרש "באר יצחק טאלטשאווא" אויף די ניין און דרייסיגסטע סטריט אין בארא פארק, און דארט משפיע געווען פאר די מתפללים קרוב צו פערציג יאר נאכאנאנד. די בית המדרש האט ער א נאמען געגעבן לשמו ולזכרו פון זיין גרויסן זיידן הגה"צ רבי אברהם יצחק גליק זצ"ל אבד"ק טאלטשאווא, בעל מח"ס באר יצחק, וועלכער איז געווען א מחותן מיטן הייליגן מנוחת אשר פון טשענגער זי"ע. אזוי אויך האט דער רב זצ"ל עוסק געווען ארויסצוגעבן לאור עולם די ספרים און חידושי תורה פון זיין גרויסן זיידן דער טאלטשאווא רב זצ"ל.

ליידער איז די לעצטע תקופה געווען ספר תורה שרוי בצער, און דער רב זצ"ל האט זיך געמוטשעט מיט א שווערע מחלה ה"י, ביז היינט צופרי ווען ער איז נתבקש געווארן לישיבה של מעלה, איבערלאזנדיג א הערליכע דור, חשובע קינדער און אייניקלעך תלמידי חכמים ומורי הוראה, ובראשם בנו הגדול הגה"צ רבי יצחק אברהם יונגרייז שליט"א דומ"ץ קהל יטב לב ד'סאטמאר שכונת 306 אין מאנסי, ומלפנים דומ"ץ ק"ק טאהש אין מאנסי. אויך לאזט דער רב זצ"ל איבער זיינע חשובע געשוויסטער, צווישן זיי כ"ק אדמו"ר מגארליץ שליט"א פון בארא פארק, און כ"ק אדמו"ר מניקלשבורג שליט"א פון בארא פארק.

די לוויה איז פארגעקומען היינט נאכמיטאג בהיכל בית מדרשו קהל באר יצחק טאלטשאווא אין בארא פארק, אויפן וועג צום בית החיים אין קרית יואל וואו דער רב זצ"ל ווערט געברענגט למנוחת עולמים.