אסטראנאמישע געהאלטן: שיף קאפיטאנען פארדינען ביז 100 טויזנט דאלאר א חודש צו אריבערפארן די געפארפולע הארמוז דורכגאס

פארגעסט פון א קאלעדזש דיגרי, שיף קאפיטאנען וואס זענען גרייט צו אריבערפארן איינע פון די מערסט געפארפולע וואסער-וועגן אין דער וועלט, מאכן היינט צוטאגס געהאלטן וואס א געווענליכע אפיס-ארבעטער קען נאר חלומ'ען דערפון.

לויט א באריכט אין די 'פיינענשעל טיימס', וועלכע ציטירט קוועלעס נאנט צו שיף-אייגנטומער און מאנשאפט מיטגלידער, פארדינען קאפיטאנען וואס פירן אריבער די שיפן דורכ'ן 'הארמוז דורכגאס' ארום 100 טויזנט דאלאר א חודש, מיט אן עקסטערע באנוס פון 50 טויזנט דאלאר פאר יעדע איינציגע מאל וואס זיי פארן אריבער דעם דורכגאס. דאס איז א ריזיגע שפרונג פונעם נארמאלן מאנאטליכן געהאלט וואס שטייט ביי ארום 15 טויזנט דאלאר, און עס צייגט ווי שטארק די שיף קאמפאניס דארפן האבן מענטשן וואס זענען גרייט צו נעמען די ריזיקע אויף זיך.

נישט נאר די קאפיטאנען, נאר אויך די פשוט'ע שיף-ארבעטער מאכן א לעבן, און פארדינען צווישן פיר און זעקס מאל מער ווי זייער געווענליכע געהאלט בלויז פארן מאכן די רייזע.

די אסטראנאמישע פרייזן קומען אין ליכט פון די פארמערטע איראנער אטאקעס אויף קאמערציאלע שיפן אינעם גאלף, וואס האט פארוואנדלט רוטינע אויל טראנספארטאציעס אין א שרעקליכע סכנה. געווענליך ווערט די געהאלט פאר די מאנשאפט געדאפלט בלויז פארן זיך געפינען אינעם ארומיגן דרום ים סוף און דעם אמאן גאלף, אבער עס שפרינגט נאך אסאך העכער איינמאל די שיף פארט אריין אינעם דורכגאס זעלבסט. איין קוועלע האט עס אראפגעלייגט אז די ארבעטער וואס זענען גרייט דאס צו טון ווערן באהאנדלט כמעט ווי 'מערסענעריס' (געדונגענע קעמפער).

אין די זעלבע צייט זענען די פרעיט פרייזן פאר קארגא וואס פארט דורך הארמוז אויך דראסטיש געשטיגן, און לויט באריכטן דערגרייכט עס ביז אן אומגלויבליכע 1.3 מיליאן דאלאר א טאג, אין פארגלייך צו די 20 ביז 50 טויזנט דאלאר א טאג בעפאר די אנגעצויגנקייטן האבן זיך אנגעהויבן.

דערווייל איז עס א ביטערע מציאות: מען צאלט אסטראנאמישע געלטער פאר אן אומגעהויער געפארפולע ארבעט, וואו מען דארף נישט קיין שום דיפלאמע, נאר בלויז שטארקע נערוון.