ניו יארק סיטי מעיאר פאדערט צו אויפלעזן די ספעציעלע פאליציי 'עס-אר-דזשי' (SRG) אפטיילונג

ניו יארק סיטי מעיאר זאהראן מאמדאני האט נאכאמאל איבערגעחזר'ט זיין פלאן און שטיצע צו אויפלעזן די ספעציעלע 'סטראטידזשיק רעספאנס גרופ' (SRG) אפטיילונג פון די ניו יארקער פאליציי דעפארטמענט (NYPD). לויט אים, דארף די פאליציי האבן א באזונדערע צוגאנג פאר קאנטער-טעראריזם און א באזונדערע צוגאנג פאר פראטעסטן וואס זענען באשיצט אונטער די ערשטע אמענדמענט.

רעדנדיג ביי א פרעסע קאנפערענץ, האט מאמדאני קלארגעשטעלט: "איך האלט אז מיר דארפן האבן א ספעציפישע פאקוס אויף קאנטער-טעראריזם וואס זאל זיין אינגאנצן אפגעטיילט פון ווי אזוי מיר גייען זיך אום מיט מענטשן וואס נוצן זייערע ערשטע אמענדמענט רעכטן."

זיינע ווערטער קומען אין ליכט פון די לעצטיגע ארעסטן פון פראטעסטירער — אריינגערעכנט עטליכע פון זיינע נאענטע פאליטישע אליאירטע — דורכאויס די ווילדע פראטעסטן וואס זענען פארגעקומען ארום דעם באזוך פון מדינת ישראל פרעמיער מיניסטער בנימין נתניהו ביי די יו-ען הויפטקווארטירן אין ניו יארק. דער מעיאר האלט זיך שוין ביי זיין שטעלונג זינט זיינע קאמפיין טעג, טענה'נדיג אז די פאקט וואס די יוניט טראגט ביידע פאראנטווארטליכקייטן פירט צו אן איבעריג-אגרעסיווע פאליצייאישע צוגאנג ביי גרויסע פאליטישע דעמאנסטראציעס.

די SRG אפטיילונג איז א ספעציעלע יוניט וואס גיט זיך אפ סיי מיט קאנטער-טעראריזם אויפגאבעס און סיי מיט 'קראוד קאנטראל' ביי גרויסע פראטעסטן און איווענטס. דער מעיאר האט אנגעוויזן אז ער האלט אינמיטן פירן געשפרעכן מיטן פאליציי קאמישינער איבער די פראקטישע וועגן ווי אזוי צו אינגאנצן אויפלעזן די יוניט, בשעת'ן זיכער מאכן אז די 'פאבליק סעיפטי' פון די שטאט ווערט נישט געשעדיגט.

דער שריט איז א טייל פון זיין ברייטערע קאמפיין-צוזאג צו רעפארמירן ווי אזוי די NYPD האנדלט מיט דעמאנסטראציעס, און צו מאכן א קלארע צעטיילונג צווישן עכטע זיכערהייט סטראשונגען און די רעכט צו פראטעסטירן.