מאיעסטעטישע דעלעגאציע  אין וואשינגטאן די. סי. ביים ספיקער 'מייק דזשאנסאן' 

אינאיינעם מיט 'מייק לאולער' פון ראקלענד קאונטי

צו אפצושלאגן דעם שרעקליכן גזירת החינוך אין ניו יארק

דעם פארלאפענעם דינסטאג פ' במדבר

היסטארישע דעלעגאציע  אין וואשינגטאן די. סי. ביים ספיקער 'מייק דזשאנסאן'

צו קעמפן קעגן גזירת החינוך אין ניו יארק

דעם פארלאפענעם דינסטאג פ' במדבר האבן די רבנים פון הצלת 'איחוד הרבנים דארה"ב' אראפגעשיקט א מאיעסטעטישע דעלעגאציע אין עיר הבירה וואשינגטאן די. סי. צו שתד'לען לפני העמים והשרים פארן צוקונפט פון יהדות ניו יארק דורך די געטרייע השתדלות פונעם קאנגרעסמאן פון ראקלענד קאונטי 'מייק לאולער' 

דער פארגאנגענעם דינסטאג פ' במדבר וועט פארשריבן ווערן מיט גאלדענע אותיות בקורות יהדות ניו יארק, ווען אין קייט פון לאנגיעריגע פעולות האבן זיך ארויסגעלאזט א מלכות'דיגע שיירא פון ניו יארק צום הויפטשטאט וואשינגטאן די. סי. צו אינטערווינירן און שתדל'ן ביי די הויכע פענסטער להצלת שארית ישראל, אז די רעגירונג זאל נישט אויספירן אירע פינסטערע פלענער ומזימות רשע צו טוישן אונזערע הייליגע בתי חינוך היל"ת.

די דאזיגע זיצונג איז צושטאנד געקומען נאך א שטארק העפטיגע השתדלות פונעם געטרייען קאנגרעסמאן 'מייק לאולער' פון ראקלענד קאונטי, און טראגט א באזונדערע ספעציעלע געוויכט צוליב דעם וואס עס איז פארגעקומען ביים פרעזטישפולן ספיקער פון רעפרעזענטאטן הויז 'מייק דזשאנסאן', וואס דער 'ספיקער' איז דער דריטער העכסטראנגיקער ערוועלטער פירער אין אמעריקא, איינס נאכן וויצע פרעזידענט, און האט א געוואלדיגע כח צו קענען באאיינפלוסן פעדעראלע געזעצן איבערן לאנד.

די דעלעגאציע איז געקומען אויפן דירעקטען איינלאדענונג פונעם ספיקער 'מייק דזשאנסאן', נאכדעם וואס א גרעסערע דעלעגאציע פון רבנים שליט"א האבן זיך שוין געטראפן מיטן ספיקער זשאנסאן אינאיינעם מיטן קאנגרעסמאן לאולער, דעם פארגאנגענעם זונטאג פ' וישב, כ"א כסליו, אין וועסטשעסטער, וואס האט דאן גאר שטארק באיינדרוקט דעם ספיקער, און ער האט אויסגעדרוקט זיין גרייטקייט צו העלפן באקעמפן דעם גזירת החינוך, און ער האט דאן איינגעלאדנט די רבנים שליט"א צו קומען קיין וואשינגטאן און דארטן זיי אויפנעמען בכבוד הראוי אינעם קעפיטאל.

גאר א היסטארישער מחזה הוד האט זיך אנטפלעקט אין די פאליטישע קארידארן אין וואשינגטאן, ווען עס זענען ערשינען אינאיינעם די מנהיגי העדה שליט"א, הלא המה הגאון הגדול הישיש רבי חיים פלאהר שליט"א - כ"ק אדמו"ר מפארשעי שליט"א - הגה"צ אבד"ק קרית קאשוי שליט"א - הגה"צ אבד"ק שאפראן שליט"א - הגה"צ אבד"ק אור לישרים שליט"א - הגה"צ אבד"ק קאשוי וומ"ס שליט"א - הגה"צ ר' שלמה ראזענבערגער שליט"א - און דער חשובער דובר משרים הרב יעקב שפירא שליט"א פון בעיסוואטער. 

ביי דעם אוידיענץ האבן זיך אויך משתתף געווען עטליכע גרויסע אדוואקאטן פון די גאר בארימטע 'עי די עף' פירמע, א'לייענס ד'עפענדינג פ'רידאם, וואס איז גאר א מאכטפולע פירמע וועלכע ספעציאליזירן זיך אין אלע סארטן אנגעלעגענהייטן וואס טוען באקריוודען רעליגיעזע רעכטען, און שוין עטליכע יאר וואס די רבנים שליט"א האבן זיי אריינגעברענגט ארויסצוהעלפן מיטן קאמף להצלת החינוך אויפן לעגאלן פראנט.

במשך דעם זיצונג האט מען ארויפגעברענגט על שולחן מלכים פארשידענע נייע אספעקטן לקדם פני הרעה וויאזוי צו באשיצן אונזער הייליגע טייערע חינוך, און נאכן אויסהערן די רירענדע דברים היוצאים מלב טהור פון די מנהיגי העדה, איבער דעם שרעקליכן געפאר פארן עתיד דורותינו, איז דער געערטער ספיקער געווארן זייער איבערגענומען, און ער האט ארויסגעברענגט מיט גאר ווארימע ווערטער זיינע געפילן פון די רבני'שע דעלעגאציע, און ער האט צוגעזאגט פאר די רבנים זיין גרייטקייט צו ארבעטן צוזאמען מיטן קאנגרעסמאן לאולער מיט וואס עס וועט זיך אויספעלען, און דאס איז נאכגעפאלגט געווארן מיט ווארימע ווערטער פון דעם קאנגרעסמאן לאולער וועלכער האט פארשפראכן זיין פולסטן צוזאמנארבייט להצלת החינוך.    

 היה עם פיפיות שלוחי עמך בית ישראל!