אוקריינע רעקארדירט סוקסעס מיט נייע 'אינטערסעפטאר' דראונס קעגן רוסישע פלי-געצייג

דער אוקריינישער פרעזידענט וולאדימיר זעלענסקי האט געמאלדן אז די אוקריינישע זיכערהייט אגענטור (SBU) האט מיט סוקסעס באוויזן אראפצושיסן א רוסישע דזשעט-געטריבענע 'געראן-5' אטאקע דראון, באנוצנדיג זיך מיט זייער א ניי-אנטוויקלטע 'אינטערסעפטאר' דראון. דאס איז שוין דאס צווייטע מאל אין איין טאג וואס די נייע טעכנאלאגיע ווערט מיט סוקסעס באנוצט.

אין א סטעיטמענט נאכן ערהאלטן א באריכט פונעם אקטירנדן SBU הויפט אלעקסאנדער פאקלאד, האט זעלענסקי איבערגעגעבן אז די מיליטערישע קאנטער-אינטעלידזשענס אגענטן האבן סוקסעספול באטראפן דעם רוסישן 'געראן-5'. דער פרעזידענט האט מיטגעטיילט א ווידעא פונעם אראפשיסן און זיך ווארעם באדאנקט פאר די זעלנער פאר זייער פונקטליכקייט. די דערגרייכונג קומט דירעקט נאך אן ענליכע סוקסעס פריער אינעם טאג שבת, ווען די זעלבע נייע אינטערסעפטאר האט אראפגעברענגט נאך א רוסישע דזשעט דראון, וואס באצייכנט דעם ערשטן מאל וואס די נייע טעכנאלאגיע ווערט פראקטיש גענוצט אויפן פראנט קעגן איינע פון מאסקווע'ס שנעלסטע און מערסט געפארפולע פלי-געצייג.

זעלענסקי האט ארויסגעברענגט אז די אוקריינישע מיליטער טעסט יעצט פיר פרישע אינטערסעפטאר דראון מאדעלן דירעקט אויפן פראנט ליין, בשעת ארום צען אנדערע פראדוצירער ארבעטן אויף נאך דיזיינס. לויט אים, זענען פאראן 67 אוקריינישע קאמפאניס וואס זענען אומשטאנד צו מאסן-פראדוצירן די סיסטעמען וואס זענען ספעציעל געבויט צו צילן דזשעט-געטריבענע צילן ווי די 'געראן-5'. פון די אלע פירמעס, האבן שוין צווישן דריי און פינף פירמעס דעמאנסטרירט פראקטישע רעזולטאטן אויפן פעלד.

די נייע אינטערסעפטארס זענען דירעקט געצילט צו נייטראליזירן די רוסישע 'שאהעד' און 'געראן' סעריע דראונס, וועלכע פליען פיל שנעלער און העכער ווי די פריערדיגע פראפעלער-געטריבענע מאדעלן. די רוסישע דראונס האבן זיך ארויסגעשטעלט צו זיין פיל שווערער אראפצוברענגען דורך אוקריינע'ס טראדיציאנאלע עיר-דעפענס סיסטעמען, וואס מאכט די וויכטיגקייט פון א פארלעסליכע, לאקאל-פראדוצירטע טעכנאלאגיע פיל מער דרינגנד, אין א צייט וואס די רוסישע דראון באמבארדירונגען ווערן אלס מער אינטענסיוו.