בס"ד

היסטארישער אויל אפמאך: פרעזידענט טראמפ גרייט זיך צו טרעפן מיט הויפט אויל עקזעקיוטיוון נאכן אונטערשרייבן 25-יעריגן קאנטראקט מיט ווענעזועלע

פרעזידענט טראמפ איז ערווארטעט אפצוהאלטן א וויכטיגע מיטינג מיט די הויפט עקזעקיוטיוון פון די אמעריקאנער אויל ריפיינעריס, קורץ נאכדעם וואס ער האט געמאלדן איבער דעם "גרעסטן אויל דיעל אין די וועלט'ס היסטאריע". דער 25-יעריגער אפמאך גיט פאר אמעריקע א ריזיגע קאנטראל אויף ווענעזועלע'ס מאסיווע אויל רעזערוון.

ווי טראמפ האט געמאלדן אויף זיין 'טרוט סאשעל' פלאטפארמע, נעמט דער דיעל אריין זיבעצן סטראטעגישע אויל פעלדער וואס פארמאגן א פאטענציאל פון 65 ביליאן פאס אויל, וואס לויט טראמפ גייט דאס מער ווי דאפלען די יעצטיגע אמעריקאנער אויל רעזערוון. דער אפמאך איז אויסגעהאמערט געווארן דורך סעקרעטערי אוו סטעיט מארקא רוביא און דיפענס סעקרעטערי פיט העגסעט, אינאיינעם מיט די פאקטישע פרעזידענטקע פון ווענעזועלע, דעלסי ראדריגעז, וועלכע האט געלויבט דעם דיעל אלס א מאסיווע טריט פאראויס צו צוריק אויפבויען איר לאנד'ס עקאנאמיע.

אונטער די טערמינען פונעם אפמאך, וועט אמעריקע אריינגיין אין א שותפות מיט א פריוואטע ווענעזועלע אפערירער צו פארמירן א נייע פירמע, וואו אמעריקע וועט האלטן א 55 פראצענט אייגנטומערשאפט און פראדוקציע רעכטן. לויט אן אמעריקאנער באאמטער, וועט דאס מאכן די נייע פירמע אלס די צווייט-גרעסטע פריוואטע אויל קאמפאני אין די וועלט לויט אירע רעזערוון. די ראדריגעז אדמיניסטראציע שאצט אז דער דיעל וועט אריינברענגען מער ווי 100 ביליאן דאלאר אין פרישע אינוועסטמענטס פאר ווענעזועלע'ס פארנאכלאזטע אויל אינדוסטריע, און וועט אריינברענגען אריבער 209 ביליאן דאלאר אין טעקס רעוועניו פאר די רעגירונג אין קאראקאס דורכאויס די יארן פונעם קאנטראקט. די פרעזידענטקע האט קלארגעשטעלט אז דער דיעל וועט נישט אוועקנעמען ווענעזועלע'ס זעלבסטשטענדיגקייט איבער אירע נאטורליכע אוצרות, נאר עס איז ענדערש א שותפות וואס איז א געווינס פאר ביידע זייטן.

דער היסטארישער אפמאך קומט עטליכע מאנאטן נאך א דראמאטישע טויש אין די פאליטישע לאנדשאפט פון ווענעזועלע, ווען אמעריקאנער קרעפטן האבן געכאפט דעם געוועזענעם פרעזידענט ניקאלאס מאדורא אין א געצילטע אפעראציע און אים געברענגט קיין אמעריקע צו שטיין א פראצעס אויף פעדעראלע דראג-שמוגלעריי קלאגעס. באלד נאך יענע אפעראציע האט טראמפ צוזאמגערופן אויל עקזעקיוטיוון אין ווייסן הויז זיי צו מוטיגן צו אינוועסטירן אין ווענעזועלע, כאטש טייל פון זיי - אריינגערעכנט דער טשערמאן פון 'עקסאן-מאביל' - האבן דעמאלטס באצייכנט דאס לאנד אלס א פלאץ וואו מען קען נישט אינוועסטירן צוליב די שוואכע קאמערציאלע און לעגאלע סיסטעם. דער נייער דיעל איז געצילט צו בארואיגן די זארגן, דורכן צושטעלן א קלארע און זיכערע סיסטעם פאר קאמפאניס וואס זענען גרייט צו אריינלייגן געלט אויפצובויען די אלטע אינפראסטרוקטור.

טראץ וואס טראמפ זאגט צו אז דער אפמאך וועט "דראסטיש נידערן די גאז פרייזן פאר אלע אמעריקאנער", ווארענען עקספערטן אז מען גייט נישט זען קיין רעזולטאטן ביים פאמפ אזוי שנעל. דער דיעל איז בעיקר געבויט אויף אומאנטוויקלטע אויל פעלדער, און ווענעזועלע'ס צעפאלענע פראדוקציע אינפראסטרוקטור וועט פארלאנגען יארן ארבעט און ביליאנען דאלארן אין אינוועסטמענטס בעפאר מען וועט קענען זען אן ערנסטע פארמערונג אין פראדוקציע. באאמטע האבן אראפגעשטעלט א ציל צו פראדוצירן מער ווי 1.5 מיליאן פאס אויל א טאג אונטער דעם אפמאך - א ריזיגע שפרונג פון די יעצטיגע פראדוקציע - אבער אנאליסטן זאגן אז עס וועט נעמען א לאנגע צייט דאס צו דערגרייכן. יעצט ווען טראמפ גייט פאראויס מיט די מיטינגען מיט די אויל עקזעקיוטיוון, בלייבט איבער צו זען די פאקטישע רעזולטאטן פונעם דיעל, סיי פאר די אמעריקאנער קאנסומער און סיי פאר די צעבראכענע עקאנאמיע אין ווענעזועלע.