בס"ד

איראנער פרעזידענט מיט שארפע אטאקעס קעגן מדינת ישראל ביי זיין רעדע אין די יו-ען

דער איראנער פרעזידענט מאסוד פעזעשקיאן האט דעם 23'סטן סעפטעמבער 2026 געהאלטן א גאר שארפע רעדע ביי די יו-ען דזשענעראל אסעמבלי, וואו ער האט אראפגעריסן און שארף אטאקירט מדינת ישראל. אין זיין רעדע האט ער באשולדיגט מדינת ישראל אין צילן סיי וועלכע געגנט אדער שטאט, און אין דורכפירן אטענטאטן "פונקט ווי אן אמת'ער טעראריסט."

פעזעשקיאן האט ווייטער געטענה'ט אז מער ווי 80,000 אומשולדיגע ציווילע זענען שוין אומגעקומען אין עזה. די ווערטער זענען געווען א טייל פון א ברייטערע, העצערישע רעדע וואס האט אויך געדינט אלס אן ענטפער צו די פרישע סטראשונגען פון אמעריקע קעגן איראן.

די רעדע קומט בלויז איין טאג נאכדעם וואס פרעזידענט טראמפ האט אין זיין יו-ען רעדע געווארנט מיט א מעגליכע באשלוס צו אינגאנצן פארניכטן די איסלאמישע רעפובליק. דאס אלעס קומט אין די צייט וואס די אנגעצויגנקייט אינעם מיטל מזרח האלט אין איין עסקאלירן, אריינגערעכנט דירעקטע אטאקעס אינעווייניג אין איראן אנהייב יאר 2026.

כאטש וואס די אפיציעלע ציפערן פון די עזה געזונטהייט מיניסטעריום שטעלן די צאל טויטע פיל נידריגער - צווישן 73,000 און 74,000 זינט אקטאבער 2023 - האט פעזעשקיאן בכוונה איבערגעטריבן די נומערן און גענוצט שארפע רעטאריק צו אונטערשטרייכן טעהראן'ס פאזיציע. די רעדע וועט ווארשיינליך נאר פארברייטערן דעם דיפלאמאטישן ריס צווישן די צוויי זייטן, בעת זיי האלטן אין איין טוישן באשולדיגונגען אינמיטן א שוואכע פייער-אפשטעל וואס ווערט כסדר פארלעצט.