היסטארישע שריט: ארום 20,000 סעמינאר מיידלעך אין ארץ ישראל נעמען אנטייל אין ריזיגן קאמפיין פאר 'קרן עולם התורה'

ארום 20 טויזנט סעמינאר מיידלעך איבער גאנץ ארץ ישראל האבן זיך אנגעשלאסן אין א מאסיווע פאנדרעיזינג קאמפיין לטובת 'קרן עולם התורה', ווען דער פאנד האט ארויסגעלאזט זייער נייע "למען תורתך" קאמפיין צו שטיצן ישיבות און כוללים יעצט אין די עשרת ימי תשובה, בעפאר דעם יום הדין יום כיפור.

גרייטנדיג זיך צום גרויסן קאמפיין, זענען פארגעקומען ריזיגע אסיפות פאר סעמינאר מיידלעך אין ירושלים, בני ברק און מודיעין עילית, וואו טויזנטער האבן זיך באטייליגט אין ספעציעלע פראגראמען איבער די וויכטיגקייט פון שטיצן לומדי תורה.

אונטער דעם נייעם איניציאטיוו, האט יעדע מיידל פון צענדליגע סעמינארן זיך אונטערגענומען א ציל צו שאפן גענוג געלט אויסצוהאלטן א ישיבה בחור אדער א כולל יונגערמאן פאר א גאנץ יאר. די מיידלעך ריטשן ארויס צו קרובים און באקאנטע צו ברענגען פרישע שטיצער פאר 'קרן עולם התורה'.

דער קאמפיין איז א גרויסע טריט פאראויס פארן פאנד. ביז לעצטנס האט זיך 'קרן עולם התורה' בעיקר פארלאזט אויף גרויסע נגידים פון אויסלאנד, אבער יעצט פרובירט מען אריינצוברענגען די ברייטע חרדי'שע פובליק און פאמיליעס איבער ארץ ישראל צו נעמען א טייל אין שטיצן דעם עולם התורה.

די העפטיגע אקטיוויטעטן זענען פארגעזעצט מיטוואך אין די הויפטקווארטירן פון 'קרן עולם התורה' אין ירושלים, וואו נגידים און קאמפיין באטייליגטע זענען געווען פארנומען מיטן פאנדרעיזינג. אין א ווידעא וואס איז ארויסגעקומען פונעם העדקווארטער קען מען זען ווי א נגיד באקומט א פערזענליכע ברכה פון א ראש ישיבה נאכן זיך באטייליגן אינעם "למען תורתך" קאמפיין.