ספעיס-עקס פלאנירט היסטארישע פראבע: וועט אנגיסן ברענשטאף פון איין ריזיגע ראקעט צום צווייטן אין ספעיס

די פירמע 'ספעיס-עקס' גרייט זיך צו וואס קען זיין די מערסט דראמאטישע פראבע אין די היסטאריע פון איר 'סטארשיפ' פראגראם: אנצופילן איין ריזיגע ספעיס-קראפט מיט ברענשטאף פון א צווייטע, בעת ביידע געפינען זיך אין ארביט ארום די ערד.

די פירמע צילט דורכצופירן די ערשטע אזא פראבע אין די ערשטע העלפט פון יאר 2027. לויט פלענער פון 'נאסא' וואס זענען פרעזענטירט געווארן ביי אן אינטערנאציאנאלע אסטראנאמיע קאנפערענץ, קוקט אויס אז עס קען פארקומען שוין אינעם ערשטן קווארטאל, מעגליך אזוי פרי ווי פעברואר.

לויטן פלאן, וועט א "ציל" סטארשיפ ארויפגעשאסן ווערן ערשט און אפווארטן אין ארביט. ארום דריי ביז פיר וואכן שפעטער, וועט א צווייטע "נאכיאגער" שיף נאכפאלגן, זיך טרעפן מיטן ערשטן, זיך צוזאמשטעלן (דאקן), און אריבערפרומפן סופער-קאלטע פליסיגע אקסידזשען און מעטעין. קיינער האט נאך קיינמאל נישט אריבערגעפירט אזויפיל קריאדזשעניק ברענשטאף צווישן צוויי ספעיס-קראפטס אין ארביט. איין גרויסע זארג איז וויפיל פונעם ברענשטאף וועט אויסוועפן דורכאויס די וואכן וואס עס ווארט. די דאטום איז נאכנישט הונדערט פראצענט זיכער, וויבאלד די פראבע איז ארגינעל געווען געפלאנט פאר 2025, דערנאך 2026, און איז שוין עטליכע מאל אפגעשטיפט געווארן.

די פראבע איז גאר קריטיש, וויבאלד די סטארשיפ קען נישט אנקומען צו די לבנה אדער קיין מארס מיט בלויז איין טאנק ברענשטאף. דער אינספעקטאר דזשענעראל פון נאסא האט שוין געזאגט אז א מיסיע צו לאנדן אויף די לבנה וועט פארלאנגען מער ווי צען טענקער פלי רייזעס אנצופילן די לאנדער אין ארביט, און די מאס ברענשטאף וואס פעלט זיך אויס פאר מארס איז נאך א סאך גרעסער.

ספעיס-עקס איז אונטער דרוק אויפצוווייזן אז די טעכניק ארבעט, נאכדעם וואס סטארשיפ האט דערגרייכט ארביט צום ערשטן מאל ביי איר 14'טע פראבע פלי. נאסא פארלאזט זיך שטארק דערויף פאר איר 'ארטעמיס' פראגראם, מיט א געפלאנטע לאנדונג פון אסטראנאטן אויף די לבנה אין אנהייב 2028.

אויב די פראבע וועט זיין א סוקסעס, וועט עס אויפווייזן אז מען קען אנגיסן א ראקעט מיט ברענשטאף אין ספעיס פונקט ווי אן עראפלאן אין די לופטן, וואס דאס קען טוישן די גאנצע צוקונפט פון ווי ווייט און ווי ביליג מענטשן קענען פארן אין ספעיס. אויב עס פאלט אדורך, קען עס נאכאמאל אפשטיפן די לבנה לאנדונג און אויפוועקן פרישע צווייפלען איבער די פלענער צו פארן קיין מארס. דערווייל ווארט די וועלט מיט שפאנונג צו זען צי צוויי פון די גרעסטע ספעיס-קראפטס וואס זענען נאר אמאל געבויט געווארן קענען זיך טרעפן, צוזאמשטעלן און טיילן ברענשטאף אן קיין פראבלעמען.