שב"כ הויפט מיט א שארפע ווארענונג צו חאמאס פירער: "מיר וועלן אייך נאכיאגן ביזן סוף, קיין שום פלאץ איז נישט צו ווייט"

דער הויפט פון די מדינת ישראל שב"כ אגענטור, דוד זיני, האט ארויסגעגעבן א שארפע און קלארע ווארענונג צו די חאמאס פירער אין עזה און איבער דער וועלט, דערקלערנדיג אז די זיכערהייט קרעפטן וועלן קיינמאל נישט אויפהערן נאכצויאגן יעדן איינעם וואס איז געווען פארמישט אינעם שרעקליכן שמחת תורה אטאקע.

רעדנדיג דעם דאנערשטאג ביי א ספעציעלע צערעמאניע אפצוגעבן כבוד פאר הויכראנגיקע שב"כ אגענטן, אין אנוועזנהייט פון פרעמיער מיניסטער בנימין נתניהו און פרעזידענט יצחק הערצאג, האט זיני זיך געוואנדן צו די פלאנירער און דורכפירער פון די מאסנמארד. ער האט געזאגט אז עס איז נישטא קיין שום פלאץ אויף דער וועלט וואס איז צו ווייט, עס איז נישטא קיין מחילה, און עס איז נישטא קיין 'עקספיירעישאן דאטום' אויף זייערע קעפ. ער האט צוגעגעבן אז מען האט זיי נאכגעגאנגען, מען גייט זיי נאך יעצט, און מען וועט זיי ווייטער נאכיאגן ביזן לעצטן מיטארבעטער, שווערנדיג אז מען וועט זיי דערגרייכן טיף אין די טונעלן, אין באהאלטענע קאמאנד צענטערן, און אין יעדן ווינקל פונעם גלאבוס.

די ווארענונג קומט אין די צייט וואס מדינת ישראל גייט אן מיט איר לאנגע קאמפיין אויפצוזוכן די פאראנטווארטליכע פאר די אטאקעס. ביי די זעלבע צערעמאניע האט נתניהו ארויסגעברענגט אז דער שב"כ האט שוין באוויזן צו עלימינירן די גרויסע מערהייט פון די חאמאס טעראריסטן וואס זענען געווען פאראנטווארטליך דערפאר, און דערצו האבן זיי פארהיטן ארום 1,000 טעראר אטאקעס אין די יו"ש געגנטער (וועסט בענק).

זיני'ס סטראשע טראגט א באזונדערע וואג, נעמענדיג אין באטראכט אז מדינת ישראל האט שוין אין די פארגאנגענהייט באוויזן אז זי איז גרייט צו אטאקירן חאמאס פירער ווייט אינדרויסן פון עזה. דאס רעכנט אריין א פרואוו צו צילן חאמאס באאמטע אין קאטאר פאראיאר, אן אפעראציע וואס מדינת ישראל האט זינט דעמאלט צוגעזאגט נישט איבערצוחזר'ן אויף קאטאר'ער באדן. אבער, ווי זיני'ס ווארענונג צייגט, אויב וועלן די פירער פארלאזן קאטאר, וועלן זיי ווידער זיין א ציל פאר די זיכערהייט קרעפטן.

ביי די צערעמאניע זענען אויסגעצייכנט געווארן 18 שב"כ אגענטן פאר זייער ראלע אין קעמפן קעגן חאמאס און איראן, אפשלאגן טעראריזם אין די וועסט בענק, און באשיצן די סייבער און טעכנאלאגישע זיכערהייט פון לאנד.