כאאס אין סיריע: מאסיווע פראטעסטן און בלאקאדעס איבער'ן גאנצן לאנד נאך דראסטישע העכערונג אין גאזאלין פרייזן

פאר א צווייטן טאג נאכאנאנד זענען פארגעקומען שווערע ראוד בלאקאדעס און פראטעסטן איבער גאנץ סיריע, נאכדעם וואס די פובליק אויפברויז האט דערגרייכט א קלימאקס צוליב א שארפע העכערונג אין די פרייזן פון ברענשטאף דורך די רעגירונג. די פרייז פון דיזעל איז ארויפגעשטיגן מיט ארום 40 פראצענט, און גאזאלין איז ארויף מיט מער ווי א פערטל.

פראטעסטירער האבן אונטערגעצינדן רעדער און אפגעשניטן הויפט הייוועיס אין עטליכע שטעט, אריינגערעכנט חאסאקא, דעיר-עז-זאר, ראקא, חאלאב (אלעפא), אידליב און דארא. דאס האט געפירט צו שווערע טראפיק פאר טראקס און האט אפגעשטעלט קאנווויס פון אויל טאנקירן וואס האבן פרובירט צו דערגרייכן די לאקאלע רעפיינעריס. די ראיאטירער האבן אויך אפגעבלאקט דעם 'אל-סווייאיא' בריק וואס פארבינדט דעיר-עז-זאר מיט איראק, און האבן פארשפארט וויכטיגע רוטס וואס פירן צו תבואה סטארידזשעס און צום 'אל-אמאר' אויל פעלד, וואס האט גענצליך אפגעשניטן די סופליי ליניעס אויף וואס א גרויס טייל פונעם לאנד איז אנגעוויזן.

אין עטליכע לאקאציעס האבן זיכערהייט קרעפטן געשאסן מיט שארפע אמוניציע אין א פרואוו צעצוטרייבן די מאסן. אין די חאסאקא פראווינץ האט א יונגערמאן זיך פרובירט אונטערצוצינדן לעבעדיגערהייט, אבער ארומיגע האבן זיך אריינגעמישט און אים אפגעראטעוועט אין די לעצטע מינוט.

די אומרוען לייגן א געוואלדיגע פרעשור אויף די נייע רעגירונג אין דמשק. די רעגירונג טענה'ט אז די פרייז העכערונגען זענען געקומען צוליב די הויכע ענערגיע קאסטן איבער די וועלט, און וויבאלד סיריע איז שטארק אנגעוויזן אויף אימפארטירטע ברענשטאף צו דעקן דעם גרויסן לאך צווישן די לאקאלע אויל פראדוקציע און די נאכפראגע. דער סירישער פארלאמענט האט ארויסגערופן דעם ענערגיע מיניסטער, מוחאמאד אל-באשיר, צו געבן אן ערקלערונג אויף די באשלוס, און געזעצגעבער האבן באשטימט אן עמערדזשענסי סעסיע אויף שפעטער די וואך, אין ליכט פון די וואקסנדע רופן צוריקצוציען פון די פרייז העכערונגען.

מיט די יעצטיגע מצב וואס סטראשעט ארויפצוטרייבן די פרייזן פון טראנספארטאציע און עסנווארג איבער'ן גאנצן לאנד, באצייכענען די פראטעסטן די ברייטסטע כוואליע פון פובליק אויפשטאנד זינט די פאל פונעם אסאד רעזשים. דאס שטעלט אהער אן ערנסטע פראבע פאר די נייע אדמיניסטראציע, צו זען וויאזוי זיי קענען זיך ספראווען מיט די שווערע עקאנאמישע קריזיס איבער'ן לאנד.