בס"ד

מאסיווע געפינס: סאודי אראביע אנטדעקט ריזיגע קוואלן פון טייערע מינעראלן און אוראניום וואס קען איבערדרייען די גלאבאלע מארקעט

דער סאודישער ענערגיע מיניסטער, פרינץ אבדולאזיז בין סאלמאן, האט געמאלדן איבער א מאסיווע מינעראלן-געפינס וואס קען אינגאנצן איבערמאכן דעם קעניגרייך'ס פלאץ אין די גלאבאלע סופליי טשעינס.

נאך גרונטליכע שטודיעס און זוכענישן ביים 'דזשאבאל סאיד' פראדזשעקט אין די מעדינה ראיאן, האבן עקספערטן אנטדעקט א געשאצטע 110 מיליאן טאן פון מאטעריאל וואס אנטהאלט הויכע קאנצענטראציעס פון זעלטענע מינעראלן (Rare earth elements), ספעציעל די שווערערע סארטן וואס זענען געווענליך זייער שווער צו טרעפן, אינאיינעם מיט גרויסע מאסן פון אוראניום.

די גרויסקייט פון דעם געפינס שטעלט דעם ארט אלס איינע פון די וויכטיגסטע מינעראלן-קוואלן וואס ווערן יעצט אנטוויקלט איבער די וועלט. אויב פרישע פראבעס וועלן באשטעטיגן די קוואליטעט און אז עס לוינט זיך פינאנציעל עס ארויסצוגראבן, וועט דאס געבן פאר סאודי אראביע א שטארקן קאנטראל אויף די סטראטעגישע מינעראלן וואס פעלן זיך אויס פאר פארגעשריטענע עלעקטראניקס, עלעקטרישע קארס, און פארטיידיגונג-טעכנאלאגיעס, און וועט אויך שטארק ארויסהעלפן זייערע פלענער פאר ציווילע נוקלעארע קראפט.

די מעלדונג קומט אין א צייט וואס סאודי אראביע ארבעט פלייסיג צו פארברייטערן איר עקאנאמיע און נישט זיין אנגעוויזן בלויז אויף אויל און גאז. באאמטע האבן שוין פארבינדן דעם נייעם געפינס מיט ברייטערע פלענער צו בויען א פולע אינדוסטריע וואס נעמט אריין דאס גראבן, פראצעסירן און רעפינירן די מאטעריאלן, אנשטאט בלויז עקספארטירן די רויע מאטעריאלן צו אנדערע לענדער.

דאס טרעפן סיי די זעלטענע מינעראלן און סיי אוראניום אויפן זעלבן פלאץ ברענגט א טאפלטע בענעפיט פאר די לאנד'ס צוקונפטיגע נוקלעארע געברויכן און זיכערהייט. די פראגע איז יעצט ווי שנעל מען וועט קענען אנטוויקלען דעם פראדזשעקט, וועלכע לענדער אדער קאמפאניס וועלן ווערן שותפים צו ארויסנעמען און פראצעסירן די אוצרות, און ווי אזוי דאס וועט טוישן סאודי אראביע'ס געא-פאליטישע קראפט אין א מארקעט וואס ווערט שוין לאנג קאנטראלירט דורך בלויז געציילטע אנדערע פראדוצירער.