היסטארישע ריזן-שיף 'עס-עס יונייטעד סטעיטס' געזינקען אין פלארידע צו דינען אלס די וועלט'ס גרעסטע קינסטליכע ריף

די לעגענדארע 'עס-עס יונייטעד סטעיטס' (SS United States) שיף, איינע פון די מערסט בארימטע פאסאזשיר שיפן אין די אמעריקאנער היסטאריע, האט געענדיגט איר לעצטע רייזע נאכדעם וואס מען האט איר דירעקט געזינקען ביים ברעג פון פלארידע דעם 11'טן נאוועמבער 2026, מיטן ציל צו שאפן וואס ערווארטעט צו זיין די וועלט'ס גרעסטע קינסטליכע ריף (artificial reef).

די היסטארישע שיף, וואס איז ארום 990 פיס לאנג און איז גרעסער ווי די באקאנטע 'טיטאניק', פארמאגט אן אויסערגעווענליכע פלאץ אין היסטאריע נאכן ברעכן א רעקארד פאר די שנעלסטע טראנסאטלאנטישע רייזע ביי איר ערשטע נסיעה אין יאר 1952 - א רעקארד וואס איז נאכנישט געבראכן געווארן ביזן היינטיגן טאג.

נאך מער ווי 800 רייזעס איבערן אטלאנטישן אקעאן און צענדליגע יארן פון סערוויס, איז די שיף ארויס פון באנוץ אין יאר 1969. זי איז אפגעשטאנען פאר לאנגע יארן אין א פארט אין פילאדעלפיע, בשעת מען האט פרובירט צו טרעפן א פערמאנענטע צוקונפט פאר איר. עווענטועל האט 'אקאלוסא קאונטי' אפגעקויפט די שיף פאר ארום 1 מיליאן דאלאר אין יאר 2024, און אונטערגענומען אן אמביציעזע 13.5 מיליאן דאלאר פראדזשעקט איר פארוואנדלען אין אן אונטערוואסער מארין-האביטאט און אן אטראקציע ארט.

נאך מער ווי א יאר פון הכנות אין מאביל, אלאבאמא, האבן ארבעטער דורכגעפירט א פארזיכטיגע און קאנטראלירטע זינקען אפעראציע. אנשטאט צו נוצן אויפרייס מאטעריאלן, האט מען אריינגעלאזט ים-וואסער ביז זי איז געזינקען. די ריזיגע שיף איז ענדליך פארשוואונדן געווארן אונטערן וואסער פונעם גאלף אוו מעקסיקא נאך עטליכע שעה, ארום 22 ים-מייל זאוט-וועסט פון דעסטין, פלארידע, וואו זי רוט יעצט אין א טיפקייט פון ארום 180 פיס.

די פארוואנדלונג איז א נייע קאפיטל פאר א שיף וואס איז אמאל באטראכט געווארן אלס א מייסטערווערק פון אמעריקאנער אינזשעניריע און א סימבאל פון אמעריקע'ס ים-אמביציעס נאך דער צווייטער וועלט מלחמה. אין אירע גוטע יארן האט די 'עס-עס יונייטעד סטעיטס' טראנספארטירט מער ווי א מיליאן פאסאזשירן, אריינגערעכנט אמעריקאנער פרעזידענטן, סעלעבריטיס און אנדערע פראמינענטע אינטערנאציאנאלע פיגורן.

בעפארן איר אראפלאזן אין וואסער, האבן ספעציעלע גרופעס ארויסגענומען אלע שעדליכע מאטעריאלן וואס קענען שאטן פאר די סביבה, געמאכט עפענונגען איבער די גאנצע סטרוקטור, און צוגעפאסט די שיף זיכערצומאכן אז זי לאנדעט געהעריג אויפן אקעאן-באדן. עס ווערט ערווארטעט אז די נייע קינסטליכע ריף וועט ציען צו זיך אסאך ים-באשעפענישן, צושטעלן א נייע אונטערוואסער וואוינארט, און ווערן א הויפט דעסטינאציע פאר דייווערס, פישער און ים-אינטערעסירטע.

לאקאלע באאמטע האפן אויך צו זען א שטארקע טוריזם בום פאר פלארידע'ס 'עמעראלד קאוסט', וואס וועט ברענגען פרישע ביזנעס פאר דייווינג אפעראטארן, פישינג טשארטערס, האטעלן און ארומיגע געגענטער. אנשטאט צו ענדיגן אלס אלטע אייזן (scrap metal), וועט די היסטארישע שיף יעצט דינען אן אינגאנצן אנדערע צוועק אונטער די כוואליעס, אפהיטנדיג איר לעגאסי בשעת'ן ביישטייערן צום מארין-עקאסיסטעם אינעם גאלף.