רעקארד צאל דעפארטאציעס אונטער טראמפ: פרעזידענט זאגט אז "גארנישט האט זיך געטוישט" נאר מען אינפארסירט די געזעצן

אויף די דירעקטע פראגע וואס פונקטליך עס האט זיך געטוישט אז זיין אדמיניסטראציע האט באוויזן צו דעפארטירן א רעקארד צאל אומלעגאלע אימיגראנטן, האט פרעזידענט טראמפ געענטפערט מיט איין ווארט: "גארנישט."

דער ענטפער קומט אין די צייט וואס די 'האומלענד סעקיוריטי' דעפארטמענט (DHS) האט ארויסגעגעבן די העכסטע מאנאטליכע אינפארסמענט ציפערן פון טראמפ'ס צווייטע טערמין. די אימיגרעישאן אגענטור (ICE) האט דורכגעפירט קרוב צו 50,000 ארעסטן און ארום 34,000 דעפארטאציעס בלויז אינעם חודש יולי 2026. אנשטאט אנצוווייזן אויף נייע געזעצן אדער פאליסיס, האט טראמפ עס אראפגעלייגט אז מען טוט פשוט אינפארסירן די געזעצן וואס זענען שוין סייווי דא אויפ'ן בוך, און די איינציגסטע זאך וואס האט זיך געטוישט איז די ווילן און די רעסורסן עס דורכצופירן.

דאס שטימט טאקע מיט וואס עס טוט זיך למעשה אויף די גאסן אין די לעצטע מאנאטן. ICE האט שטילערהייט פארברייטערט אירע אפעראציעס איבער'ן גאנצן לאנד, א דאנק א מאסיווע בודזשעט העכערונג אונטער די "וואן ביג ביוטיפול ביל" אקט, וואס האט אריינגעפלאסן ביליאנען דאלארן פאר גרעניץ און אינערליכע אינפארסמענט. באאמטע ווייזן אויך אן אויף פראגראמען וואס ערמוטיגן זעלבסט-דעפארטאציע און א שטערקערע פאקוס אויף ארעסטן ביי ארבעטס-פלעצער. כאטש די אגענטור ווערט קריטיקירט פארן נישט ארויסגעבן קלארע דאטא, ווייזן די ציפערן אז ביז יוני האט די דעפארטמענט שוין רעקארדירט איבער 356,000 דעפארטאציעס, און די יולי ציפערן זענען א דירעקטע פארזעצונג פון דעם מאמענטום.

פאר טראמפ און זיין אדמיניסטראציע איז דער "גארנישט האט זיך געטוישט" ענטפער א גוטע פאליטישע שריט. עס גיט פאר'ן ווייסן הויז די מעגליכקייט צו נעמען קרעדיט פאר'ן דעליווערן די קאמפיין צוזאג פון מאסן דעפארטאציעס, אן דארפן מסביר זיין פארוואס אין די ערשטע מאנאטן פונעם טערמין זענען די ציפערן געווען פיל שוואכער, ווען ארעסטן זענען געווען פיל העכער ווי די פאקטישע דעפארטאציעס. עס שטיצט אויך אונטער זיין ברייטערע "אמעריקע פוירסט" מעסעדזש אז די עקזיסטירנדע געזעצן זענען גענוג שטארק צו ברענגען דראמאטישע רעזולטאטן, אן דארפן צוקומען צום קאנגרעס פאר נייע אימיגרעישאן בילס.

פון די אנדערע זייט, ווייזן קריטיקירער אן אז די טויש קומט יא פון פרישע שטאב, מער פלאץ אין די טורמעס, און א שטארקע אינערליכע דרוק פון באאמטע ווי דער דעפיוטי טשיף אוו סטעף, סטיווען מילער, צו הייבן די ארעסט ציפערן.

צו עס האט זיך טאקע "גארנישט" געטוישט, אדער צו די פרישע ציפערן זענען א רעזולטאט פון נייע פאנדן און טאקטיקן, בלייבט א דעבאטע צווישן אימיגרעישאן אנאליסטן. אבער איין זאך איז קלאר: די יולי ציפערן זענען א הויכפונקט פאר די אדמיניסטראציע, און עס קומט נאך חדשים פון פראסטראציע ביי קאנסערוואטיווע שטיצער וואס האבן געשפירט אז די דעפארטאציעס זענען צו שוואך. מיט אן ערווארטונג אז די ICE בודזשעט און שטאב וועט נאר וואקסן אין די קומענדיגע יארן, זעט אויס אז די אדמיניסטראציע איז גרייט צו שטיפן די מאנאטליכע ציפערן נאך העכער, אומאפהענגיג צו די געזעצן האבן זיך געטוישט אדער נישט.