טערקיי פראבירט אויס א מאסיווע 'קאמיקאזע דראון' שווארעם וואס קען פליען איבער טויזנט קילאמעטער אן קיין GPS

טערקיי האט סוקסעספול אויסגעפרובירט א נייע סארט אטאקע באנוצנדיג זיך מיט צענדליגע "סיווריסינעק" (SİVRİSİNEK), אדער ווי מען רופט עס די "מאסקיטא" קאמיקאזע דראונס. די דראמאטישע עקסערסייז צייגט אן אטאקע וואס ווערט קאארדינירט דורך 'עי-איי' (AI) און קען גרייכן א ציל פון איבער 1,000 קילאמעטער אן זיך דארפן פארלאזן אויף א דזשי-פי-עס (GPS) סיגנאל.

פרישע ווידעא פונעם פראבע צייגט ווי די קליינע דראונס פליען אינאיינעם אין אן ענגע פארמאציע דורך די וואלקענעס, בעפאר זיי טיילן זיך אפ אין כוואליעס און פליען אראפ צו צילן אויף דער ערד, וואס ענדיגט זיך מיט מעכטיגע אויפרייסן.

די דראונס, וואס זענען אנטוויקלט געווארן דורך די באקאנטע טערקישע פירמע 'בייקאר' (Baykar), וועגן ארום 76 ביז 78 קילאגראם, און טראגן א 20-קילאגראם באמבע. נאכן ווערן ארויסגעשאסן קענען זיי פליען אין די לופטן פאר אכט ביז ניין שעה אדער מער. א דאנק זייער פארגעשריטענע 'עי-איי' טעכנאלאגיע קענען די דראונס קאמיוניקירן איינע מיט די אנדערע און אפערירן אן קיין פראבלעם אפילו אין ערטער וואו סעטעלייט סיגנאלן זענען געבלאקט אדער נישט עוועילעבל. דאס מאכט זיי זייער שטארק קעגן עלעקטראנישע מלחמה-מיטלען וואס ווערן גענוצט צו צומישן נאוויגאציע סיסטעמען.

די יעצטיגע פראבע איז א דירעקטע פארזעצונג פון פריערדיגע טעסטס וואס זענען פארגעקומען אין יאר 2026, וואו מען האט אויסגעפרובירט די 'מאסקיטא' דראונס אינאיינעם מיט 'K2' קאמיקאזע סיסטעמען און די גרעסערע 'בייראקטאר' דראונס, פליענדיג אינאיינעם אין א קאארדינירטע פארמאציע. די פירערשאפט פון די פראדזשעקט גיט איבער אז דאס איז א קלארע שריט פאראויס צו א צוקונפט פון מאסיווע אטאקעס וואס קאסטן ביליג און קענען איבערוועלטיגן די שונא'ס פארטיידיגונגס סיסטעמען מיט די ריזיגע צאל דראונס וואס קומען אן אויפאמאל מיט א קלוגע קאארדינאציע.

מיליטערישע עקספערטן ווייזן אן אז אזעלכע דראון-שווארעמס קענען טוישן דעם גאנצן בילד פון מאדערנע מלחמות. די נייע טעסט אונטערשטרייכט טערקיי'ס שנעלע פארשריט אין די פעלד פון אומבאמאנטע סיסטעמען און איר ציל צו האבן פראקטישע דראון-שווארעם טאקטיקן גרייט פארן שלאכטפעלד. ווי די דראונס ווערן אלס מער פארגעשריטן, ווערט די "מאסקיטא" באטראכט אלס א מעכטיגע צוגאב צו די וואקסנדע פלאטע פון טערקישע קאמיקאזע וואפן.