פרעזידענט טראמפ מיט שארפע קריטיק קעגן אוקראינישן פרעזידענט זעלענסקי: "עס איז שווערער צו פארהאנדלען מיט אים ווי מיט פוטין"

פרעזידענט דאנאלד טראמפ האט אפן ארויפגעדרייט דעם פרעשור אויפן אוקראינישן פירער וולאדימיר זעלענסקי. אין אן אינטערוויו מיט 'ניוזמעקס' וואס איז פארעפנטליכט געווארן דעם 15'טן אקטאבער, האט טראמפ געזאגט אז "זעלענסקי איז נישט קיין גוטער מענטש פאר אונז צו פארהאנדלען מיט."

לויט טראמפ, זאגט זעלענסקי אז ער וויל שלום, אבער ער מיינט עס נישט אמת'דיג. טראמפ האט צוגעגעבן אז עס איז אים פיל שווערער צו פארהאנדלען מיט זעלענסקי ווי מיטן רוסישן פרעזידענט וולאדימיר פוטין. ער האט אנגעוויזן אז אויב עס וועט למעשה צושטאנד קומען א שלום אפמאך, וועט עס ווארשיינליך נישט פאסירן ווען זעלענסקי זיצט ביים טיש, כאטש ביידע זייטן ווילן באמת אז די מלחמה זאל זיך ענדיגן. דער הויפט שטער צו א דיעל, לויט טראמפ, איז א פערזענליכע: פוטין און זעלענסקי האבן זיך פשוט פיינט, און די טיפע האס מאכט אן אפמאך כמעט אוממעגליך.

די שארפע רייד קומען קורץ נאכדעם וואס אוקראינע האט באנייט אירע אטאקעס אויף רוסישע אויל אינפראסטרוקטור, אריינגערעכנט א דראון אטאקע אויף אן אויל פאבריק אין ריאזאן. דאס קומט נאכדעם וואס זעלענסקי האט אראפגענומען די באגרעניצונגען אויף צו אטאקירן רוסישע רעפיינעריס, אלס אן ענטפער צו די כסדר'דיגע רוסישע אטאקעס אויף אוקראינע'ס ענערגיע אינפראסטרוקטור. טראמפ האט געזאגט אז ער האט קלאר געווארנט קיעוו אפצולאזן די רוסישע אויל פאבריקן, וויבאלד די קאנסעקווענצן דערפון שאפן א גלאבאלע פראבלעם, און ער האט געפאדערט פון זעלענסקי זיך אפצושטעלן דערפון.

די ווארענונג פון טראמפ קומט עטליכע טעג נאך א פרישע דיעל צווישן אמעריקע און רוסלאנד, וואס ערלויבט מאסקווע צו צושטעלן מער ווי 300,000 טאן דיזל פאר אמעריקע און די גלאבאלע מארקעט אין אויסטויש פאר א פארלייכטערונג אין סאנקציעס — א שריט וואס זעלענסקי האט געזאגט אז עס האט אים איבערגעלאזט שטארק אנטוישט.

אין צוגאב צו זיין קריטיק, האט טראמפ באנייט זיין פאדערונג אז אוקראינע זאל אפהאלטן פרישע וואלן, און האט ארויפגעברענגט דעם געדאנק אז דאס לאנד ברויך באקומען א נייעם פירער. די ווערטער ברענגען ארויף פרישע פראגעס איבער די צוקונפט פון די באציאונגען צווישן אמעריקע און אוקראינע און די ווייטערדיגע שלום פארהאנדלונגען.