ספעיס-עקס גרייט זיך פאר היסטארישע 'סטארשיפ' פלי רייזע; וועט צום ערשטן מאל אריינגיין אין ארביט

די קאסמאס-פארשונג פירמע 'ספעיס-עקס' גרייט זיך צו וואס קען זיין די מערסט קריטישע און היסטארישע 'סטארשיפ' פלי רייזע ביז היינט.

די פירמע צילט אדורכצופירן דעם לאונטש קומענדיגן דינסטאג, סעפטעמבער 22, אפהענגיג אין די באשטעטיגונג פון די רעגולאציע אגענטורן. די 75-מינוטיגע לאונטש פענסטער וועט זיך עפענען 7:15 אינדערפרי (סענטראל צייט) פונעם 'סטארבעיס' צענטער אין סאוט טעקסאס.

אנדערש ווי אלע פריערדיגע דרייצן פלי רייזעס, וואס האבן בלויז געמאכט א האלב-ארביטאלע רייזע און זענען צוריק אראפגעקומען אין די זעלבע שעה, איז די יעצטיגע פלי רייזע - באקאנט אלס 'פלייט 14' - דיזיינט צו שיקן דעם סטארשיפ אין אן עכטע ארביט ארום דער ערד צום סאמע ערשטן מאל.

ספעיס-עקס האט ארויסגעגעבן א נייע 54-סעקונדע ווידעא וואס צייגט דעם ראקעט גרייט אויפן לאונטש טורעם, נאענטע בילדער פון די מעכטיגע 'רעפטאר' מאטארן, און דראמאטישע בילדער פון די פייער-טעסטס ביינאכט וואס האבן אויפגעלאכטן דעם גאנצן סטארבעיס געגנט.

אויב די מיסיע גייט אדורך מיט סוקסעס, וועט דער ראקעט אויך ארויסלאזן 26 דריטע-גענעראציע 'סטארלינק V3' סעטעלייטס אין ספעיס. יעדע פון די סעטעלייטס וועט צושטעלן א פולע 'טעראביט' פער סעקונדע פון נעטווארק קעפעסיטי. דאס וועט באצייכענען דאס ערשטע מאל וואס סטארשיפ טראגט א פעילאוד וואס ברענגט אריין רעוועניו פאר די פירמע.

די יעצטיגע פלי רייזע איז די קומענדיגע פאזע אין ספעיס-עקס'ס ציל צו האבן א פולשטענדיגע און שנעלע איבערנוצבארע (reusable) סטארשיפ סיסטעם, א ציל אין וואס די פירמע האט שוין אריינגעגאסן ביליאנען דאלארן. דער 'סופער העווי' בוסטער וועט פרובירן זיך אליינס צוריקצוקערן און לאנדן ביי אן אפשאר לאנדינג פונקט אינעם גאלף אוו מעקסיקא. אבער ספעיס-עקס האט באשטעטיגט אז זיי וועלן דאסמאל נישט פרובירן צו כאפן דעם בוסטער אדער דעם שיף מיטן לאונטש טורעם. אילאן מאסק האט געזאגט אז מען האט אפגעלייגט דעם אמביציעזן פלאן אויף שפעטער, כדי אויסצומיידן די ריזיקע פון א טייערע דורכפאל.

די פירמע האט אונטערגעשטראכן אז סעפטעמבער 22 בלייבט דערווייל בלויז אן אינערליכע ציל און נישט קיין ענדגילטיגע דאטום. אלעס ווענדט זיך אין די וועטער, רעגולאציע באשטעטיגונגען, און די לעצט-מינוטיגע זיכערהייט אונטערשריפטן וואס דארפן אלע פאלן אין פלאץ. אויב עס וועט זיך אויסלאזן מיט א סוקסעס, וועט 'פלייט 14' זיין א מעכטיגע אנטוויקלונג פאר דעם פראגראם, וואס וועט רוקן סטארשיפ נענטער צו די רוטינע ארביטאלע אפעראציעס וואס ספעיס-עקס האפט אז עס וועט עווענטועל אינגאנצן איבערנעמען די 'פאלקאן 9' און 'פאלקאן העווי' ראקעטן.