ירושלים - א שרעקעדיגע עקסידענט האט פאסירט דינסטאג אקטאבער 27 אין ירושלים, ווען א באס אויף רוט 422 האט אריינגעקראכט אין די סעיפטי באריערס ביי די זייט פונעם וועג אין די צייט פון א רעגנדיגע וועטער. בחסדי השם זענען נישט באריכטעט געווארן קיין שום פארוואונדעטע.

לויט א באריכט פון 'בעלאז', איז דער באס געפארן פונעם דירעקציע פונעם רמות מאל, ווען דער דרייווער האט פלוצלינג געהאט שוועריגקייטן אפצושטעלן דעם פארמיטל. דער באס האט זיך ענדליך אפגעשטעלט נאכן אריינקראכן אין די אייזערנע באריערס ביים זייט פונעם גאס, וואס האט אפגעהאלטן דעם באס פון פארן ווייטער און מעגליך פאראורזאכן אן ערנסטע קאטאסטראפע.

ערשטע באריכטן געבן אן אז דער דרייווער האט מעגליך געהאט א פראבלעם מיט די ברעיקס. אבער די פונקטליכע אורזאך פונעם אינצידענט איז נאכנישט אפיציעל באשטעטיגט געווארן, און עס בלייבט אומקלאר צי עס איז טאקע געווען א מעכאנישע פראבלעם אדער די גליטשיגע גאסן וואס האבן צוגעברענגט דערצו.

בילדער און ווידעאוס פונעם סצענע צייגן דעם 422 באס אפגעשטעלט נעבן די באריערס מיט א שווערע שאדן צום פראנט פונעם באס, און עטליכע מענטשן האבן זיך פארזאמלט ארום. די לאקאלע פאליציי זענען געווען אויפן ארט אויסצופארשן דעם עקסידענט. טראץ דעם שרעקעדיגן אינצידענט, האט זיך עס ברוך השם געענדיגט אן קיין שום פארוואונדעטע.