צענטקאם קאמאנדיר: אמעריקע האט באגלייט א ביליאן פאס קרוד אויל דורכן הארמוז דורכגאס; איראנער עקספארטן געפאלן צו נול

דער קאמאנדיר פון די אמעריקאנער 'צענטקאם' קרעפטן, אדמיראל ברעד קופער, האט די וואך איבערגעגעבן א ברייטע אפדעיט איבער די אנגייענדע מיליטערישע אפעראציעס אינעם מיטל מזרח, מעלדנדיג אז אין די לעצטע צוויי מאנאטן האבן אמעריקאנער קרעפטן באשיצט און באגלייט דעם טראנזיט פון מער ווי א ביליאן פאס 'קרוד אויל' דורכן סטראטעגישן הארמוז דורכגאס.

לויט קופער, האבן די אמעריקאנער מיליטער ארויסגעהאלפן מער ווי 2,000 קאמערציאלע שיפן אדורכצופארן דעם וואסער-וועג. ער האט צוגעגעבן אז די הויפט שיפינג רוטס זענען שוין אינגאנצן אויסגערייניגט געווארן פון מינעס, און אז די טראפיק אין די לעצטע צוויי וואכן איז געווען העכער ווי סיי ווען אין די לעצטע האלב יאר.

אין דער זעלבער צייט האט קופער ארויסגעברענגט א דראסטישע טויש, זאגנדיג אז איראן האט עקספארטירט פונקטליך נול פאס אויל זינט די בלאקאדע איז צוריק ארויפגעלייגט געווארן. דאס איז א שווערע קלאפ פאר א לאנד וואס איז שטענדיג געווען אנגעוויזן אויפן דורכגאס אלס זייער הויפט עקספארט רוט. ווי אויך האט ער אנטפלעקט אז די אמעריקאנער קרעפטן ארבעטן אינאיינעם מיט ראיאנישע אליאירטע אויפצושטעלן א נייע קאאליציע אטאקע דראון יוניט, און צו פארשטארקן די לופט-פארטיידיגונג סיסטעמען איבערן גאנצן ראיאן.

קופער האט אנגעוויזן אויף די פרישע ציפערן אלס א באווייז אז די מאמענטום אינעם גאלף ווערט אלס שטערקער. ער האט געזאגט אז צענטקאם ארבעט ווייטער האנט-ביי-האנט מיט אלע זעקס מיטגלידער פונעם 'גאלף קאאפעראציע קאונסיל', אינאיינעם מיט אמעריקאנער אגענטורן, אינשורענס קאמפאניס, און שיפינג פירמעס, צו האלטן די טראפיק פלוס הויך און זיכער.

פון די אנדערע זייט, לייקנט איראן אפ די באהויפטונגען אז זייערע עקספארטן זענען געפאלן צו נול. דער איראנער אויל מיניסטער, מאכסען פאקנעדזשאד, האט פאריגע חודש מודה געווען אז די עקספארטן זענען טאקע געפאלן, אבער ער האט זיך געהאלטן ביי דעם אז דאס לאנד ליפערט נאך אלס אויל פאר קאסטומערס אינדרויסן פון אירע טעריטאריאלע וואסערן. דאס צייגט אז די פונקטליכע עפעקט פון די בלאקאדע איז נאך אלס אונטער א פראגע צייכן.

די קעגנזייטיגע באהויפטונגען שטרייכן אונטער ווי צענטראל דער הארמוז דורכגאס - איינע פון די וועלט'ס וויכטיגסטע ענערגיע קארידארן - איז געווארן אינעם ברייטערן קאנפליקט צווישן וואשינגטאן און טעהראן, וואו קאנטראל איבערן וואסער-וועג דינט יעצט אלס דער הויפט מאס-געסטעל צו זען ווער עס האט די אויבערהאנט.