בס"ד

מדנ"י מיליטער אנטדעקט חיזבאללא טעראר טונעל באהאלטן אונטער א ציווילע וואוינונג אין דרום לבנון

די מדנ"י מיליטער האט געמאלדן אז טרופן האבן אנטדעקט א חיזבאללא טעראר טונעל גאר אינעווייניג אין א ציווילע וואוינונג אין די 'על-מאנסורי' געגנט אין דרום לבנון, דורכאויס א פרישע אפעראציע.

זעלנער פון די 55'סטע בריגאדע, וועלכע אפערירן אונטער די 91'סטע דיוויזיע אינעם זיכערהייט זאנע, האבן אינאיינעם מיט די ספעציעלע 'יהלום' איינהייט חרוב געמאכט איבער 600 טעראר אינפראסטרוקטור צילן און אכט אונטערערדישע טונעלן. ווי אויך האבן זיי געפונען צענדליגע מיסיל ארויסשיסערס וואס זענען איבערגעלאזט געווארן נאך בעפאר די פייער-אפשטעל אפמאך איז אריין אין קראפט.

אין א ווידעא וואס די מיליטער האט ארויסגעגעבן, קען מען זען ווי די זעלנער גייען אדורך די טונקעלע און שמאליגע טונעלן מיט פלעשלייטס, וואו מען זעט קלאר די האלצערנע שטיצעס און די סטרוקטור פונעם טונעל אונטער דעם וואוין-בנין.

די ברייטע אפעראציע אין על-מאנסורי איז געצילט צו פארמיידן חיזבאללא פון צוריק אויפבויען זייער אנוועזנהייט אינעם ראיאן נאכן פייער-אפשטעל פון יוני 2026. די מיליטער האט קלארגעשטעלט אז די אפעראציע איז א טייל פון זייערע אנגייענדע אקטיוויטעטן צו באזייטיגן סיי וואספארא סטראשע קעגן ציווילע בירגער און קרעפטן, בשעת'ן אפהיטן די פייער-אפשטעל טערמינען.

ענליכע שריט זענען שוין גענומען געווארן פריער אינעם יאר, אריינגערעכנט דאס פארניכטן א 200-מעטער לאנגע טונעל נעבן 'מאזשדאל זון'. די מיליטער האט אונטערגעשטראכן אז זיי וועלן ווייטער אנגיין מיט די ארבעט צו פארניכטן די פארבליבענע אינפראסטרוקטור און אפשטעלן סיי וועלכע פרואוון פון די טעראר גרופע זיך צוריק אויפצובויען אין דרום לבנון.