שוידערליכע ווידעא צייגט ווי מאסיווע פארפלייצונגען רייסן דורך א האטעל פארקינג גאראדזש אין לאס וועגאס נאך היסטארישע רעגן

אן אומגלויבליכע נייע ווידעא צייגט ווי בלאטיגע וואסער, פיל מיט שמוץ און ברוכווארג, רייסט דורך דעם פארקינג גאראדזש פונעם 'לינק האטעל' (Linq Hotel) אויפ'ן לאס וועגאס סטריפ, נאכדעם וואס די איבערבלייבענישן פון טראפיקאלע שטורעם 'רעיטשעל' האבן אנגעווייקט די דעזערט שטאט דעם זונטאג, אקטאבער 11.

לאס וועגאס האט באקומען 1.08 אינטשעס רעגן ביים 'הערי ריעד אינטערנאציאנאלע עירפארט', וואס האט צעשמעטערט דעם אלטן טעגליכן רעקארד פון 0.78 אינטשעס וואס איז געשטעלט געווארן צוריק אין יאר 2012. דאס האט געפירט צו א 'פלעש פלאד' ווארענונג פאר טיילן פונעם טאל. כאטש וואס פאר רוב טיילן פון אמעריקע הערט זיך איין אינטש ווי א קליינע צאל, איז עס אבער פאר איינע פון די טרוקנסטע שטעט אין לאנד געווען גענוג צו פארוואנדלען די גאסן און פארקינג עריעס נעבן דעם סטריפ אין א ווילדע טייך.

דער גאראדזש איז ארגינעל געבויט געווארן אויף אן אופן וואס זאל לאזן שטורעם-וואסער דורכפליסן, א דיזיין וואס איז געמאכט צו קענען הענדלען דעזערט וואסערן, אבער די יעצטיגע פארפלייצונג האט געוויזן ווי שנעל אזא סיסטעם קען זיך איבערדרייען צו א פולשטענדיגע קאטאסטראפע.

שטורעם רעיטשעל האט שוין פריער אינעם וויקענד געשמיסן די סאוטערן קאליפארניע ברעגעס, און אפילו נאכ'ן פארלירן איר טראפיקאלע קראפט, האט איר פייכטקייט ווייטער געצויגן טיפער אין לאנד און אנגעמאכט פלאד סטראשונגען איבער די גאנצע סאוטוועסט ראיאן. פלאד ווארענונגען זענען געבליבן אין קראפט ארום לאס וועגאס ביז אריין פרי מאנטאג, און וועטער זאגער האבן שוין געווארנט פאר טעג אז דער ראיאן שטייט אויס אן אומגעווענליכע נאסע פאזע.

די דרעינידזש סיסטעמען אינעם דעזערט זענען געבויט פאר קורצע, שארפע טאנדערסטארמס, און נישט פאר א נאכאנאנדיגע שטראם פון טראפיקאלע רעגן וואס גיסט זיך אין א קורצע צייט-אפשניט. דאס איז די סיבה פארוואס אפילו א רעקארד-ברעכנדע אינטש רעגן איז געווען גענוג איבערצופילן טיילן פונעם סיסטעם.

עטליכע באריכטן און לאקאלע ציפערן צייגן אז עס איז געפאלן נאך מער רעגן אין אנדערע טיילן פונעם טאל, און דעריבער ווערט דאס פולע בילד פון די שאדנס נאך אלץ צוזאמגעשטעלט. וויבאלד די זעלטענע טראפיקאלע איבערבלייבענישן גרייכן אלס מער צו ערטער וואס זעען דאס כמעט קיינמאל נישט, קומט ארויף די פראגע צי שטעט ווי לאס וועגאס זענען באמת גרייט פאר די קומענדיגע מאל.