נייע מצבה און דענקמאל אויפגעשטעלט אויף קבר אחים אין פוילן לזכר 241 קדושים

א נייע מצבה און דענקמאל איז לעצטנס אויפגעשטעלט געווארן אויף א קבר אחים אין דעם שטעטל גראדזשיסק (Grodzisko Dolne), נעבן ליזשענסק אין פוילן, אפצוגעבן כבוד פאר 241 אידישע קדושים וועלכע זענען אומגעברענגט געווארן דורך די נאציס ימ"ש ביי די צווייטע וועלט קריג.

די אומשולדיגע קרבנות זענען רח"ל אומגעברענגט געווארן אין יאר 1941 און זענען באגראבן געווארן אין א גרויסן קבר אחים, וואס איז ליידער געבליבן אן קיין געהעריגע מצבה אדער צייכן פאר מער ווי אכט צענדליג יאר.

נאך לאנגע און שווערע באמיאונגען דורך אייניקלעך פון די קדושים און היסטארישע פארשער, איז דער פונקטליכער ארט פונעם קבר אחים געווארן דאקומענטירט און באשטעטיגט. דאס האט געפירט דערצו אז מען זאל ענדליך קענען ארויפשטעלן א פאסיגע מצבה און דענקמאל אפצוגעבן דעם ריכטיגן כבוד פאר די קדושים און פאראייביגן זייער אנדענק.

ביי א ספעציעלע מעמד וואס איז פארגעקומען אויפ'ן ארט, האט הרב יוסף נטע גאלדברענער פארגעזאגט קדיש לעילוי נשמת די קדושים. דער נייער דענקמאל וועט אי"ה דינען אלס א בלייבנדער זכר און כבוד פאר די 241 אידישע נשמות וואס זענען אומגעקומען על קידוש השם דורכאויס דעם ביטערן חורבן.