ארויסגעווארפענער ווענעזועלער פירער ניקאלאס מאדורא צייגט אינטערעסע אין אידישקייט אין ברוקלין טורמע

דער געוועזענער און ארויסגעווארפענער פירער פון ווענעזועלע, ניקאלאס מאדורא, וועלכער זיצט יעצט אין א פעדעראלע טורמע אין ברוקלין, ניו יארק, האט לויט באריכטן אנגעהויבן ארויסווייזן אן אינטערעסע אין אידישקייט.

לויט א באריכט אין די 'ניו יארק טיימס', פארברענגט מאדורא זיין צייט אונטער גראטעס מיט'ן שטודירן רעליגיעזע און פילאזאפישע ביכער, אריינגערעכנט להבדיל דעם תנ"ך און דעם קוראן. ווי אויך טרעפט ער זיך כסדר מיט די רעליגיעזע טשעפלעינס אין די טורמע, אריינגערעכנט מיט א ראביי.

די נייע אנטוויקלונג איז ספעציעל אינטערעסאנט און קומט אלס אן איבערראשונג, נעמענדיג אין אכט מאדורא'ס לאנגיעריגע אפענע פיינטשאפט קעגן מדינת ישראל. דאס איז טראץ וואס אין די פארגאנגענהייט האט ער שוין אמאל געפרואווט טענה'ן אז ער שטאמט פון ספרד'ישע אידן.

מאדורא געפינט זיך ווייטער אונטער ארעסט אין די ברוקלין טורמע ווארטנדיג אויף זיין פראצעס אויף שווערע פעדעראלע קלאגעס, אויף וועלכע ער האט זיך דערקלערט 'נישט שולדיג'.