דראמאטישע וואלן אין ארץ ישראל: עקזיט פאולס צייגן אומקלארע רעזולטאטן; נתניהו בלאק האלט ביי 50 ביז 60 זיצן

נאך א לאנגע און שטורמישע וואל טאג אין ארץ ישראל, האבן זיך די שטים בודקעס אפיציעל פארמאכט 10:00 ביינאכט, און די ערשטע עקזיט פאולס צייגן אז דאס לאנד גייט מעגליך אריין אין א פרישע פאליטישע פלאנטער. קיין איין זייט האט דערווייל נישט קיין קלארע מאיאריטעט צו קענען גרינדן א רעגירונג, וואס קען פירן צו שווערע קאאליציע פארהאנדלונגען.

לויט די עקזיט פאולס פון קאנאלן 11, 12, און 13, באקומט דער רעכטער בלאק אונטער פרעמיער מיניסטער בנימין נתניהו בלויז 50 זיצן אין די 120-זיצן כנסת, בשעת דער אפאזיציע בלאק אונטער גדי אייזנקאט (פון די 'ישר' פארטיי) באקומט צווישן 52 און 53 זיצן. די אראבישע פארטייען באקומען ארום 17-18 זיצן, וואס מאכט זיי פאר א מעגליכע צונג ביים וואגשאל.

פון די אנדערע זייט, האט קאנאל 14 ארויסגעשטעלט א אינגאנצן אנדערע בילד, וואו זיי געבן פאר נתניהו'ס בלאק 60 זיצן - בלויז איין זיץ ווייניגער פון די 61 וואס פעלט זיך אויס פאר א מאיאריטעט.

א הויפט פראבלעם וואס קען שטערן נתניהו איז אז צוויי קליינע רעכטע פארטייען - עפר ווינטער'ס 'עמך ישראל' און די פארטיי פון יועז הנדל און ירון זליכה - האבן לויט די שאצונגען נישט אריבערגעשפרייזט דעם אחוז החסימה (עלעקטארעל טרעשהאלד) פון 3.25 פראצענט. אויב דאס בלייבט אזוי ביי די אפיציעלע רעזולטאטן, גייען זייערע שטימען אין מיסט, וואס קען טוישן די גאנצע בילד.

תיכף נאכן ארויסקומען פון די עקזיט פאולס, האט גדי אייזנקאט דערקלערט אז ער גייט ארבעטן שנעל צו טוישן די רעגירונג און אראפווארפן נתניהו, כאטש ער האט צוגעגעבן אז מען דארף ווארטן אויף די אפיציעלע רעזולטאטן צו זען פונקטליך וויאזוי די קאאליציע מאטעמאטיק וועט זיך אויסשטעלן.

היסטארישע טוירנאוט און מאסיווע אקציעס אין בני ברק

די היינטיגע וואלן האבן געזען אן אומגעהויערע און היסטארישע טוירנאוט. ביז 8:00 אוונט האבן שוין 74.3 פראצענט פון די בארעכטיגטע וויילער אפגעגעבן זייער שטימע, וואס איז די העכסטע ראטע פאר די צייט פונעם טאג זינט יאר 1988, און א שפרונג פון 8 פראצענט קעגן די פריערדיגע וואלן אין 2022.

אין די היימישע שטאט בני ברק האט מען געזען א מאסיווע אקציע אין די לעצטע מינוטן, ווען איבער 300 וואלאנטירן זענען געזעסן אויף די טעלעפאנען צו מאכן זיכער אז יעדער גייט ארויס שטימען בעפאר די בודקעס פארמאכן זיך.

צוליב די לאנגע רייעס ביי די שטים בודקעס איבערן לאנד, האבן עטלעכע פארטייען, אריינגערעכנט ליכוד און ש"ס, געבעטן צו פארלענגערן די צייט ביז 11:00 ביינאכט. די צענטראלע וואל קאמיטע האט אבער געמאלדן אז יעדער וואס שטייט שוין אין די רייע בעפאר 10:00 וועט קענען שטימען, אפילו אויב עס נעמט שפעטער אריין אין די נאכט.

אויך אין די תפיסות איבערן לאנד האט מען געזען א הויכע טוירנאוט, ווען 88.7 פראצענט פון די ארעסטאנטן האבן אפגעגעבן זייער שטימע, א שארפע העכערונג פון די 2022 וואלן.

אינצידענטן, ארעסטן און קלאגעס דורכאויס דעם טאג

דער טאג איז נישט אריבער אן קיין אינצידענטן און געשלעגן. אין די שטאט טייבע איז אראבישער חבר הכנסת אחמד טיבי אריינגעמישט געווארן אין א ווילדע געפעכט ביי א שטים בודקע.

אין א באזונדערע אינצידענט אין רהט, זענען פיר פערזאן ארעסטירט געווארן נאך א געשלעג צווישן צוויי פאמיליעס וואס האבן זיך באגעגנט ביי די וואלן.

אינדערפרי האט די פאליציי ארעסטירט דריי פארדעכטיגטע אין די נגב ראיאן אויף קלאגעס פון וואלן-כאבאר, נאכדעם וואס מען האט געטראפן קאווערטן מיט צענדליגע טויזנטער שקלים אינאיינעם מיט צעטלעך פון די אראבישע 'רע"ם' פארטיי.

ווי אויך האט נפתלי בנט'ס 'ביחד' פארטיי אריינגעגעבן קלאגעס אז די ליכוד פארטיי נוצט אומלעגאלע עפפס צו נאכפאלגן וויילער ביי די שטים בודקעס.

די וואל קאמיטע האט קלארגעשטעלט אז עס איז שטרענג פארבאטן צו נוצן סיי וועלכע טעכנאלאגיע צו טרעקן ווער עס קומט שטימען.

טראץ פארשידענע קלאגעס איבער געפעלשטע אדער פארשוואונדענע צעטלעך, האט די קאמיטע געמאלדן אז זיי האבן נישט געטראפן קיין באווייזן פון סיסטעמאטישע פעלשונגען, און יעדע לאקאלע פראבלעם ווערט באהאנדלט אויפן פלאץ.

דערווייל ווארט גאנץ ארץ ישראל מיט שפאנונג אויף די אפיציעלע רעזולטאטן וואס וועלן אריינקומען אין די קומענדיגע שעה'ן, צו זען ווער עס וועט ענדליך קענען צוזאמשטעלן די קומענדיגע רעגירונג.