דער געוועזענער שעף פון די מדינת ישראל מוסד אגענטור, דדי ברנע, האט דאנערשטאג גערופן צו פארשטארקן די עקאנאמישע, דיפלאמאטישע און אפעראציאנעלע דרוק קעגן די איראנער רעזשים, דערקלערנדיג אז די קאמפיין דארף אנגיין ביז די רעזשים פאלט אינגאנצן צוזאמען.

ביי א ספעציעלע צערעמאניע וואס די ירושלים'ער מוניציפאליטעט האט אפגעראכטן לכבודו, האט ברנע באגריסט די שטרענגע סאנקציעס וואס דער אמעריקאנער פרעזידענט דאנאלד טראמפ האט געמאלדן קעגן איראן, אבער ער האט קלארגעשטעלט אז סאנקציעס אליין וועלן נישט זיין גענוג.

"לויט מיין אפשאצונג, וועט נישט זיין קיין אנדערע ברירה נאר צו פארשטארקן די עקאנאמישע, דיפלאמאטישע און אפעראציאנעלע שריט קעגן דעם רעזשים ביז עס פאלט — און עס וועט טאקע פאלן," האט ברנע געזאגט.

ברנע האט ארויסגעברענגט אז די איראנער פראבלעם איז פיל מער ווי בלויז א סכנה פאר מדינת ישראל. ער האט געווארנט אז אויב מען וועט נישט לעזן די טעראר סטראשע פון טעהראן, וועט עס עווענטועל אפעקטירן לענדער איבער די גאנצע וועלט דורך באליסטישע מיסילס, אינטערנאציאנאלע טעראריזם, און די אנטוויקלונג פון נוקלעארע וואפן.

ער האט אויך אנגעוויזן אז אסאך איראנער בירגער אליין ווילן זען דעם יעצטיגן רעזשים אונטערגיין, און האט צוגעגעבן אז די מערב וועלט לענדער, אנגעפירט דורך אמעריקע און מדינת ישראל, זענען אלס מער אנטשלאסן זיך צו ספראווען מיט טעהראן.

די ווערטער זענען א המשך צו די שטעלונג וואס ברנע האט שוין אויסגעדרוקט ענדע פון זיין טערמין אלס מוסד דירעקטאר. ביי זיין געזעגענונגס צערעמאניע אין יוני, האט ער געזאגט אז אונטערברענגען די איראנער רעזשים איז א "מעגליכע און דערגרייכבארע ציל", און האט טענה'ט אז דאס דארף בלייבן א הויפט פריאריטעט.

ברנע האט געענדיגט זיין פינף-יעריגן טערמין אלס הויפט פונעם מוסד אין יוני, און איז איבערגענומען געווארן דורך ראמאן גאפמאן.

זיינע פרישע קאמענטארן קומען אין א צייט פון באנייטע דרוק אויף טעהראן, און צייגן אז לויט זיין בליק דארפן עקאנאמישע סאנקציעס קומען אינאיינעם מיט שארפערע דיפלאמאטישע און אפעראציאנעלע שריט, און מען קען זיך נישט בלויז פארלאזן אויף די סאנקציעס אליין.