פלארידע: 31-יעריגער מאן ארעסטירט פארן סטראשענען מיט א מאסן-שיסעריי אויף א נייע חרדי'שע ישוב

א 31-יעריגער מאן פון פלארידע איז ארעסטירט געווארן נאכן סטראשענען דורכצופירן א מאסן-שיסעריי אויף א נייע חרדי'שע קהילה וואס ווערט יעצט געבויט אין גלעידס קאונטי, פלארידע, לויט ווי די פלארידע דעפארטמענט אוו לאו ענפארסמענט (FDLE) גיט איבער.

דער פארדעכטיגטער, אידענטיפיצירט אלס דזשערי רעי סניד פון ארלאנדא, איז ארעסטירט געווארן מיטוואך, אקטאבער 28, נאך אן אויספארשונג איבער סטראשונגען אויף סאשעל מידיע וואס זענען געווען געצילט קעגן 'לעיקפראנט עסטעיטס', א נייע אידישע פראדזשעקט וואס ווערט געבויט נעבן לעיק אקיטשאבי.

לויט די אויטאריטעטן, האט זיך די אויספארשונג אנגעהויבן דעם 19'טן אקטאבער, נאכדעם וואס די פאליציי איז געוואויר געווארן פון אנליין סטראשונגען קעגן די קהילה. די אויספארשער זאגן אז די פאוסטס האבן אריינגערעכנט בילדער פון א פייער-וואפן, אינאיינעם מיט אינפארמאציע וואס צייגט אן די פונקטליכע לאקאציע פונעם נייעם דעוועלאפמענט. די FDLE אינוועסטיגעיטארס האבן דערנאך אידענטיפיצירט סניד אלס דער וואס שטייט אונטער די סטראשונגען און אים ארעסטירט.

סניד שטייט יעצט אויס ערנסטע קלאגעס פארן מאכן געשריבענע אדער עלעקטראנישע סטראשונגען דורכצופירן געוואלדטאטן אדער א מאסן-שיסעריי, ווי אויך פארן אומלעגאלן באנוץ פון א קאמוניקאציע דעווייס. דער קעיס ווערט באהאנדלט דורך די סטעיט אטוירני אפיס פאר פלארידע'ס 20'סטע דזשודישעל סירקוט.

'לעיקפראנט עסטעיטס' איז א נייע היימישע פראדזשעקט וואס ווערט יעצט דעוועלאפט צוצושטעלן הייזער און קהילה אינפראסטרוקטור פאר אידישע משפחות. דער פלאן רעכנט אריין בתי מדרשים, ישיבות, און אנדערע געברויכן פאר די וואקסנדע קהילה. די שרעקעדיגע סטראשונגען האבן נאטירליך אויפגעוועקט זארג איבער די זיכערהייט פון די אידישע איינוואוינער און משפחות וואס פלאנירן זיך אהין צו ציען.

די אויטאריטעטן גיבן איבער אז בחסדי השם איז קיין שום שיסעריי נישט פארגעקומען, און די אויספארשונג גייט נאך אן.