שטורעם אין ארץ ישראל: א חתן איז ארעסטירט געווארן דורך מיליטערישע פאליציי אינמיטן זיינע שבע ברכות

א פריש-געקרוינטער חתן, א ישיבה בחור וועלכער איז ארעסטירט געווארן דורך די מדינת ישראל מיליטערישע פאליציי אינמיטן פארן מיט זיין כלה צו א שבע ברכות, איז באפרייט געווארן מאנטאג אינדערפרי, נאוועמבער 2, נאך א שטארקע אויפברויז אין די חרדי'שע גאס.

דער חתן, הבחור יערי ליבערמאן, א תלמיד פון ישיבת אור החיים, איז פארהאלטן געווארן זונטאג איבער זיין מיליטערישע סטאטוס, בלויז עטליכע טעג נאך זיין חתונה. דער ארעסט האט איבערגעלאזט די כלה אין א שטארקע פאניק און עגמת נפש, נאכדעם וואס ציוויל-געקליידעטע אפיצירן האבן אוועקגעפירט איר מאן אין ארעסט.

אינמיטן די שווערע מינוטן, האט הגאון ר' משה הלל הירש שליט"א, ראש ישיבת סלאבאדקע, פערזענליך אנגעקלינגען די כלה איר צו געבן חיזוק און ברכות. אין א ווידעא וואס איז פארשפרייט געווארן זעהט מען ווי דער ראש ישיבה רעדט מיט איר אויפ'ן טעלעפאן, אין די צייט וואס עסקנים האבן געארבעט אומערמידליך צו באפרייען איר מאן.

ש"ס חבר הכנסת ינון אזולאי האט שארף פארדאמט דעם ארעסט ביי אן אינטערוויו אויף 'קול חי' ראדיא, פרעגנדיג וויאזוי מ'קען טון אזא אכזריות'דיגע שריט צו ארעסטירן א חתן אינמיטן זיינע שבע ברכות. חרדי'שע פאליטישאנס האבן תיכף אנגעהויבן לייגן א שווערן דרוק אויף די מיליטערישע אויטאריטעטן אים צו באפרייען. דער ארעסט האט אויך ארויסגערופן שטורמישע פראטעסטן אין ירושלים און אין בית שמש, וואו מאסן זענען ארויסגעקומען אין די גאסן צו פראטעסטירן דעם אומרעכט.

נאך אינטערווענצן פון לעגאלע פארטרעטער און געשפרעכן מיט מיליטערישע באאמטע, איז ליבערמאן'ס ארעסט פארקורצט געווארן, און ער איז באפרייט געווארן אהיים צוריק צו זיין כלה מאנטאג אינדערפרי.

דער אינצידענט האט פריש אויפגעוועקט די זארג און אנגסט אין די חרדי'שע קהילות איבער די אגרעסיווע מיליטערישע גיוס קאמפיין קעגן ישיבה בחורים.