די ניו יארקע פאליציי דעפארטמענט (NYPD) האט ארויסגעגעבן פרישע סורוועילענס ווידעא פון צוויי סוספעקטן וועלכע ווערן געזוכט אין פארבינדונג מיט א בייזוויליגע וואנדאליזם אטאקע אויף צוויי ארטאדאקסישע שולן אין קווינס, בעת דעטעקטיווס פירן ווייטער אן אן אינטענסיווע זוכעניש נאך די פארברעכער שוין מער ווי א חודש נאכן אינצידענט.

די אטאקעס זענען פארגעקומען די נאכט פון יולי 16 אריין צו דעם קומענדיגן אינדערפרי, ווען די ציל זענען געווען די "יאנג איזראעל אוו דזשאמייקע עסטעיטס" און די "יאנג איזראעל אוו האליסוואוד" בתי מדרשים. די פאליציי'ס 'העיט קריים טעסק פארס' פארשט אויס ביידע אינצידענטן אלס א העיט קריים (פארברעכן פון האס).

לויט די פאליציי, האבן זיך צוויי פארשוינען דערנענטערט צום אונטערשטן טייל פון די דזשאמייקע עסטעיטס שול, וועלכע געפינט זיך אויף 83-10 188'טע סטריט, ארום 11:44 ביינאכט. די פארברעכער האבן געווארפן זעקלעך אנגעפילט מיט מאטאר אויל, אנמאכנדיג שאדנס צום געביידע. די סוספעקטן זענען דערנאך אנטלאפן אין א טונקל-קאלירטע 'שעווראלעט סובורבאן' קאר.

די יאנג איזראעל פון האליסוואוד, אויף 86-25 פראנסיס לואיס בולעווארד, איז אויך געווארן אטאקירט אין די זעלבע נאכט, וואו פאליציי זאגט אז מען האט דארט אויך געווארפן זעקלעך מיט מאטאר אויל. דער ארטיגער רב, הרב משה טויב, האט איבערגעגעבן נאך די אטאקע אז די שול איז אויך באשמירט געווארן מיט צואה, כאטש די ערשטע פאליציי באריכטן האבן בלויז דערמאנט די מאטאר אויל.

דער שרעקליכער וואנדאליזם איז אנטדעקט געווארן דורכ'ן ציבור מתפללים וועלכע זענען אנגעקומען אין שול צו תפילת שחרית דעם קומענדיגן אינדערפרי.

אדאם ארלאוו, דער פרעזידענט פון די דזשאמייקע עסטעיטס שול, האט קלארגעשטעלט אז די קהילה וועט זיך נישט לאזן אנשרעקן פון די אטאקע. ער האט דערציילט אז זינט דעם אינצידענט האט די שול אינסטאלירט ספעציעלע צעמענטענע זיכערהייט באריערס צו באשיצן דעם בנין פון קארס, צוגעבנדיג אז די זארג איבער סעקיוריטי איז ליידער געווארן א טעגליכע רעאליטעט פאר שולן איבער ניו יארק סיטי. אויך דער ארטיגער רב, הרב דוב לערנער, האט זיך ענליך אויסגעדרוקט אז די פרואוון אנצוווארפן א פחד וועט נאר פארשטארקן די פעסטקייט פון די קהילה ווייטער צו קומען אין שול און דאווענען אינאיינעם.

די פאליציי האט די וואך ארויסגעגעבן די נייע סורוועילענס ווידעא פונעם דזשאמייקע עסטעיטס אינצידענט, אין א פרואוו צו בעטן די הילף פונעם פובליק צו אידענטיפיצירן די צוויי סוספעקטן. דערווייל זענען נאך קיין ארעסטן נישט דורכגעפירט געווארן, און די אויספארשונג גייט ווייטער אן. ב"ה קיינער איז נישט פארוואונדעט געווארן אין ביידע אינצידענטן.

ווער עס האט סיי וואספארא אינפארמאציע ווערט געבעטן זיך צו פארבינדן מיט די פאליציי 'קריימס סטאפערס' אויף 1-800-577-TIPS (8477).