מדינת ישראל פאליציי פארעפנטליכט פרישע ווידעאו ווי פאלעסטינער ווארפן שטיינער ביי די עוואקואציע פון אן 'אונרא' קאמפלעקס

נייע רעקארדירונגען וואס זענען ארויסגעגעבן געווארן דורך די מדינת ישראל פאליציי צייגט ווי פאלעסטינער אראבער ווארפן שטיינער פונעם דאך פון א געביידע דורכאויס די עוואקואציע פון אן 'אונרא' (UNRWA) קאמפלעקס נעבן קאלאנדיע די וואך. דאס גיט א קלארערע בילד איבער דעם אינצידענט וואו פינף פאלעסטינער זענען פארוואונדעט געווארן פון פאליצייאישע קוילן.

דער אינצידענט האט פאסירט דינסטאג ביי אן אפעראציע אינעם אונרא טרענירונג צענטער אין כפר עקב, נעבן דעם קאלאנדיע פליטים לאגער. לויט די פאליציי, האבן גרעניץ פאליציי (מג"ב), צה"ל קרעפטן און די ירושלים פאליציי באוואכט די עוואקואציע פונעם קאמפלעקס, ווען א גרופע אויפן דאך האט אנגעהויבן ווארפן שווערע שטיינער אויף די זיכערהייט קרעפטן אונטן.

די פאליציי זאגט אז דאס ווארפן שטיינער האט געשטעלט די קרעפטן אין א דירעקטע סכנה, וואס האט געפירט דערצו אז די גרעניץ פאליציי אפיצירן זאלן עפענען פייער. פינף מענטשן אויפן דאך זענען פארוואונדעט געווארן. די נייע פאליציי ווידעאו צייגט קלאר ווי די חברה אויפן דאך ווארפן זאכן אויף די קרעפטן.

די ווידעאו קומט נאכדעם וואס פאלעסטינער באריכטן האבן זיך קאנצענטרירט אויף די פארוואונדעטע ביי די אפעראציע. די פאלעסטינער נייעס אגענטור 'וואפא' האט באריכטעט דינסטאג אז עטליכע זשורנאליסטן זענען פארוואונדעט געווארן בשעת'ן דעקן די איבערנעמונג פון די אונרא געביידע, כאטש יענע באריכט האט נישט באשטעטיגט אז די מענטשן וואס מ'זעט ווארפן שטיינער אין די נייע פאליציי ווידעאו זענען טאקע געווען זשורנאליסטן.

די ברייטערע אפעראציע האט זיך אנגעהויבן דינסטאג ווען די מדינת ישראל אטאריטעטן זענען אריין און איבערגענומען קאנטראל פונעם קאלאנדיע טרענירונג צענטער. מדינת ישראל באאמטע האבן געזאגט אז די שריט איז דורכגעפירט געווארן אין איינקלאנג מיט די נייע געזעצן וואס פארבאטן אונרא אפעראציעס אין מדינת ישראל טעריטאריע. פרעמיער מיניסטער בנימין נתניהו האט געזאגט אז ער האט פארארדנט די עוואקואציע פונעם קאמפלעקס לויט'ן געזעץ.

די אונרא אגענטור האט שארף פארדאמט דעם שריט, אנרופנדיג דעם אריינגאנג אין די געביידע אלס אומאויטאריזירט, און טענה'ט אז דער קאמפלעקס איז באשיצט אלס א יו-ען (UN) געביידע אונטער אינטערנאציאנאלע געזעצן. פון די אנדערע זייט האלטן די מדינת ישראל אטאריטעטן זיך ביי זייערס אז אונרא איז נישט דער אייגנטומער פונעם פראפערטי, און אז דער פלאץ וועט אנשטאט גענוצט ווערן פאר לאקאלע שולעס און אנדערע קאמיוניטי געברויכן צו דינען די איינוואוינער פון כפר עקב.

די פרישע ווידעאו לייגט צו נאך א שטיקל באווייז צו די קעגנזייטיגע באריכטן ארום די געוואלדטאטן דורכאויס די אפעראציע.