בס"ד

פלארידע: א 29-יעריגער מאן ארעסטירט נאכן סטראשען מיט טויט דעם באקאנטן אידישן קאמענטאטאר בען שפירא

א 29-יעריגער מאן פון קענזעס איז ארעסטירט געווארן אין פלארידע, נאכדעם וואס אויטאריטעטן האבן אים אנגעקלאגט פארן כסדר'דיג סטראשען צו דערמארדן דעם באקאנטן אידישן קאמענטאטאר בען שפירא. די סטראשונגען אויף סאשעל מידיא האבן געצילט שפירא'ס אידישע גלויבן און האבן אריינגערעכנט א "קאונטדאון" (ציילונג) וואס האט געצילט אויף דעם אנגעקומענעם יום טוב יום כיפור.

דער פארדעכטיגטער, קארבי עראן סטרוב פון הארטן, קענזעס, איז ארעסטירט געווארן אין פאלם ביטש קאונטי דעם 12'טן סעפטעמבער. לויט די אויטאריטעטן, שטייט ער אויס 23 קלאגעס פארבינדן מיט שריפטליכע אדער עלעקטראנישע טרעטס (סטראשונגען) צו הרג'ענען אדער פאראורזאכן פיזישע שאדן, אינאיינעם מיט נאך צוויי קלאגעס פארן נוצן קאמיוניקאציע מיטלען דורכצופירן א פארברעכן.

די אויספארשונג:
לויט די געריכטליכע דאקומענטן, האט זיך די אויספארשונג אנגעהויבן נאכדעם וואס די סעקיוריטי פערסאנאל וואס באשיצן שפירא האבן אלארמירט די אויטאריטעטן איבער די שרעקעדיגע פאוסטס וואס זענען ארויפגעלייגט געווארן אויף דער 'עקס' (טוויטער) פלאטפארמע צווישן יולי 31 און אוגוסט 2. די אויספארשער זאגן אז עטליכע פאוסטס האבן ספעציפיש דערמאנט שפירא'ס אידישע אידענטיטעט, בשעת א כסדר'דיגע קאונטדאון האט געוויזן אז ער פלאנט עפעס ארום די צייט פון יום כיפור.

די אויטאריטעטן האבן נאכגעספירט דעם אקאונט דורך רעקארדס פון עקס, גוגל און סטארלינק. אן אגענט פונעם 'סיקרעט סערוויס' האט נאכדעם אויסגעפרעגט סטרוב אין זיין היים אין קענזעס דעם 4'טן אוגוסט, וואו ער האט זיך מודה געווען אז ער האט געשריבן די פאוסטס.

אנטיסעמיטישע מאטיוון:
די קלאגעס ווערן באהאנדלט אלס א מעגליכע האס-פארברעכן געטריבן פון רעליגיעזע אנטיסעמיטיזם. לויט די דאקומענטן, האבן טייל פון די פאוסטס אנטהאלטן קלארע אנטיסעמיטישע שפראך און טרעטס דירעקטירט קעגן שפירא בלויז צוליב דעם וואס ער איז א איד.

סטרוב ווערט דערווייל געהאלטן אין ארעסט אין פאלם ביטש קאונטי בעת דער קעיס גייט פאראויס אין געריכט.