אנטווערפן - אן אומבאקאנטער מאן איז ארעסטירט געווארן דורך די לאקאלע פאליציי אין אנטווערפן, בעלגיע, נאכדעם וואס ער האט זיך פארגעשטעלט ווי א פעדעראלע פאליציאנט און זיך אריינגעכאפט אינעם שטוב פון אן אנגעזעענעם חרדי'שן עסקן און קאמיוניטי פירער, וואס האט זיך אויסגעלאזט מיט א געוואלדטאטן קאנפראנטאציע.

לויט באריכטן, האט דער פארדעכטיגטער אנגעקלאפט ביים טיר פון די פאמיליע און געזאגט אז ער קומט אויספארשן א מעגליכע גניבה. נאכ'ן באקומען ערלויבעניש אריינצוקומען אין שטוב, האט זיין פארדעכטיגטע אויפפירונג אנגעהויבן וועקן חשדות ביי די פאמיליע מיטגלידער, וועלכע האבן באלד אלארמירט די לאקאלע פאליציי און די וואלאנטירן פון 'חברים' אין אנטווערפן.

ווען מען האט אים קאנפראנטירט, איז דער פארשוין געווארן ווילד און אנגעהויבן סטראשען די אנוועזנדע אין שטוב. די פאליציי אינאיינעם מיט די חברים וואלאנטירן האבן אים עווענטועל באוויזן צו איבערקומען און אים גענומען אין ארעסט.

די ארטיגע אויטאריטעטן האבן געעפנט אן אויספארשונג איבער דעם אינצידענט צו דערגיין זיינע עכטע מאטיוון.