אינטערעסאנטע סצענע אין רומעניע: לאקאלע פאליציי שטעלט אפ חסידים אויפן וועג קיין אומאן פאר א 'גרופע בילד'

רומעניע — אידן וואס זענען אנגעקומען אין א רומענישע עירפארט אויפן וועג קיין אומאן אויף ראש השנה, זענען אויפגעהאלטן געווארן דורך די לאקאלע פאליציי פאר א גאר אומגעווענליכע סיבה: די פאליציאנטן האבן פשוט געוואלט כאפן א בילד צוזאמען מיט זיי.

לויט ווי דער זשורנאליסט ינקי פרבר גיט איבער, האבן די רומענישע פאליציי אפיצירן געבעטן די רייזנדע חסידים זיך אפצושטעלן אינעם טערמינאל און זיך שטעלן פאר א בילד אינאיינעם מיט די פאליציי, בעפאר זיי קענען פארזעצן זייער רייזע.

די קאמישע עפיזאד קומט אין די צייט וואס צענדליגע טויזנטער אידן פון איבער דער גארער וועלט מאכן זיך יעצט דעם וועג קיין אומאן, צו וויילן אויף יו"ט ראש השנה ביים ציון פון הרה"ק רבי נחמן מברסלב זי"ע.

ווי באקאנט, זענען די לופטן העכער אוקראינע שוין לאנג פארמאכט פאר קאמערציאלע פליגערס צוליב די אנגייענדע מלחמה, וואס צווינגט די פילע טויזנטער רייזנדע צו פליען צו די ארומיגע לענדער ווי רומעניע, און פון דארט פארזעצן דעם לאנגן וועג קיין אומאן אויף דער יבשה מיט באסעס און טעקסיס.

דאסמאל, כאטש, איז דער קורצער אפשטעל אינמיטן דעם שווערן וועג אריבער מיט א שמייכל - און א שיינע גרופע בילד.