אין די טעג פון סליחות: א נייע מוזיקאלישע ווערסיע אויפן באקאנטן פיוט "אראלי מעלה"

אין די צייט וואס די קולות פון סליחות אפקלאנגען אין די בתי מדרשים איבער דער וועלט אין די הייליגע ימים נוראים טעג, האט די אידישע מוזיק גרופע Jalle ארויסגעגעבן א פרישע און הערליכע ווערסיע פונעם אלט-באקאנטן פיוט "אראלי מעלה", אריינברענגענדיג א נייעם מוזיקאלישן טעם אינעם הונדערטער-יארן אלטן פיוט.

דער ניגון איז באזירט אויף די הייליגע ווערטער וואס ווערן געזאגט אין די ספרד'ישע סליחות, וואס שילדערט ווי די מלאכים אויבן אין הימל אינאיינעם מיט כלל ישראל אונטן אויף דער ערד זאגן אויס די גרויסקייט פונעם באשעפער, וואס פירט זיך אויס מיט די הייליגע ווערטער "ה' הוא האלקים".

די נייע ווערסיע פון Jalle קאמבינירט טראדיציאנאלע מיטל-מזרח אינסטרומענטן מיט א מאדערנעם מוזיקאלישן אראנזשירונג. דער זינגער אלירן מזוז פירט אן מיט די וואקאלן און שפילט אויפן גיטאר, אינאיינעם מיט גל חבר אויפן 'קאנון' און אנדערע אינסטרומענטן, חנני זית אויפן פלייט און קווייער, און עמית שרון אויף פערקאשן, בעיס און וואקאלן.

די מוזיקאלישע אראנזשירונג איז צוזאמגעשטעלט געווארן דורך די מיטגלידער פון די גרופע אינאיינעם מיט גיא כהן, וועלכער האט אנגעפירט מיט די מוזיקאלישע פראדוקציע. זיי האבן באוויזן אהערצושטעלן א מייסטערווערק וואס האלט אן דעם ארגינעלן טראדיציאנאלן חן פונעם פיוט, אבער מיט א היינט-צייטיגן מוזיקאלישן קלאנג.

די נייע סינגל, וואס איז ארויסגעקומען יעצט אין די טעג פון סליחות בעפאר יום כיפור, איז א טייל פון א רייע נייע מוזיקאלישע פראיעקטן וואס ווערן ארויסגעגעבן אין די לעצטערע יארן, וואס ברענגען ארויס די ווארימקייט פון די אלטע פיוטים און ניגונים פון די ימים נוראים אויף א פרישן אופן.